Smittevernteamet avklarer nærkontaktar til den smitta - kommuneoverlegen ber alle om å følgja smittevernreglane

Ein person har testa positivt på koronavirus i kommunen. Nå blir det jobba kontinuerleg med å få avklart kven som har vore i kontakt med den smitta.

Testa ved Suldal legekontor

Fredag mottok kommuneoverlege Harald Bjarne Hellesen informasjon frå laboratoriet på Stavanger universitetssjukehus om at ein person har testa positivt på covid-19.

Kommuneoverlegen seier at vedkommande hadde symptom på sjukdommen og blei derfor testa ved Suldal legekontor. Personen, som er heimehøyrande i Suldal, er for øvrig i relativt god form med berre lette symptom på smitte. Den smitta oppheld seg nå heime og er isolert. Grunna personvernet vil ikkje Hellesen uttala seg noko meir om kjønn, alder eller kor den smitta er busett.

– Men det er ingenting som tydar på at den smitta kan ha påført smitte til institusjonar eller bu- og omsorgssenter i kommunen, seier han og legg til at den smitta personen vil bli følgt opp til vedkommande er heilt frisk.

Truleg smitta på reise

Suldal kommune sitt smittesporingsteam starta umiddelbart med å få oversikt over kva kontaktar den smitta har hatt, og det kommunale teamet har vore i direkte dialog med Folkehelseinstituttet for å få råd i arbeidet. Mykje tyder på at det er eit fåtal personar som kan ha blitt smitta og at det er kontroll på kontaktmønsteret til den smitta. Vedkommande har vore på reise, og kommunen trur det er lite sannsynleg at det er smitte frå personar i Suldal som er årsaka til at vedkommande blei smitta.

Nærkontaktar i karantene

Kommunen har tatt kontakt med personar som kan ha blitt smitta. Nærkontaktane, som kommunen ikkje vil talfesta, er nå i karantene og er blitt testa for koronavirus. Det blir jobba med å få avklart om dei også er blitt smitta. Nærkontaktane det gjeld må ha negativt prøvesvar før dei er klarerte, etterpå må dei følgja med på eventuelle symptom i ti døgn etter siste kontakt med smitta. Legekontoret sendar prøvane til laboratorie i Stavanger og får vanlegvis svar innan eitt døgn. Om påkrevd kan ein også få raskare svar. Så langt har dei altså berre fått eitt positivt prøvesvar.

Ikkje ta ferie frå smittevernreglane

– Me må fortsatt halda avstand, minst ein meter, og vaska hendene. Alle med akutt luftvegsinfeksjon skal holde seg heime til dei er symptonfrie, oppmodar Hellesen. Han meiner alt tyder på at me berre har sett starten av pandemien her i kommunen og samanliknar det med eit langdistanseløp.

– Alle kan bidra til å avgrensa smittespreiinga, seier han og minner om at plassar der mange folk treffest, som utestader og kjøpesentre, fort kan bli alvorlege kjelder til smittespreiing.