Sommarvêret kjem til heile landet i helga

Fram mot helga blir det stabilt og varmt vêr i landet. Alle landsdelar kan oppleva 20 grader laurdag og søndag.

– Det kjem eit høgtrykk austover frå Island, som skubbar vekk lågtrykket over landet og trekkjer med seg varmare luft inn mot Nord-Norge. Berre éin vêrstasjon i nord hadde tosifra temperatur i går, men det endrar seg til helga, seier vakthavande meteorolog Ingvild Villa til NTB.

Mykje varmare

Heile Nord-Norge blir ganske likt. Her har det vore kjølig og nedbør i det siste, med lite vêr som minner om sommar. Dette endrar seg nå. Frå seint torsdag og inn i fredagen blir det betre sør i Nord-Norge. Seinare blir det også betre i Troms og Finnmark.

– Vêret blir stabilt, men det er litt meir uvisse knytt til skydekket. Vêret blir uansett mykje varmare. På laurdag blir det 15 til 16 i nord. Det kan til og med bli over 20 grader i Aust-Finnmark på søndag, fortel Villa.

Stabilt og fint i Midt- og Sør-Norge

Frå Trøndelag til Agder blir det stort sett det same vêret fram mot helga, med varme temperaturar og lite nedbør.

– I Trøndelag og Møre og Romsdal har det vore dårleg, men det skal bli betring frå og med i morgon. Temperaturane stig og det blir ei solfylt helg med temperaturar opp mot 20 grader, og også over 20 grader til helga, seier Villa. Ho forklarer at Vestlandet stort sett får det same vêret fram mot helga på grunn av høgtrykket, men det er usikkert kor mykje skyer det blir.

Morgontåke på Vestlandet

– Vestlandet kan oppleve morgontåke enkelte stader, men når sola kjem fram forsvinn denne. Det blir mykje sol, også her kan det bli skyer, men temperaturane skal opp. Bergen kan håpa på både 23 og 24 over helga. Så langt i år har dei ikkje hatt temperaturar over 20 grader.

Austlandet får også mykje det same vêret. Det kan likevel vere ein viss fare for ettermiddagsbyger på grunn av varme luftmassar over Aust- og Innlandet.

– Det blir mykje sol og varme temperaturar som kjem opp mot 25 grader fleire stader. Heilt enkelt blir det sol og sommar til helga, forklarer meteorologen.

Skogbrannfaren aukar

Det er allereie sendt ut eit oransje farevarsel for skogbrann over delar av Austlandet, Agder, Rogaland og Hordaland. Samtidig er det fare for torevêr enkelte stader i Innlandet, som gir ekstra fare for skogbrann.

– Oransje er det høgaste farevarselet me sender ut på skogbrann, men det er moglegheiter for at det oransje varselet blir utvida, spesielt på Vestlandet. Det er ekstremt tørt, så ein skal vere obs og følgje med på oppdateringar og varsel som kjem.

(©NPK)