Stavanger-biskopen går av
Anne Lise Ådnøy (68) går av som biskop i Stavanger etter påske. Ho har då hatt verva i sju år.
– For meg er sju år eit passeleg tidsrom å få vere biskop i. Eg har sagt at eg ønskte å få med meg 900-årsjubileet som biskop, seier ho i ei pressemelding.
Vart vigsla i 2019
Annonse
Tidlegare i år feira Stavanger bispedømme, Stavanger domkyrkje og Stavanger by 900 år.
Ådnøy vart utnemnd som biskop av Kyrkjerådet 24. januar 2019 og vart vigsla 17. mars same år. Det var protestar mot utnemninga, mellom anna fordi ho ville vigsle skeive.
– Klok kvinne og kollega
Ho seier at ho likevel har vorte teke varmt imot.
Annonse
– Eg har hatt gode møte med dei som har vore usamde med meg. Vi har same mål: Å peike på Jesus og opne kyrkja opp for endå fleire, seier ho.
Preses Olav Fykse Tveit omtaler Ådnøy som ein klok kvinne og kollega, som han har lytta til.
Har gjort døra høg og porten vid
– Anne Lise er ein biskop som har gjort døra høg og porten vid. Eg har sett pris på dei teologiske bidraga hennar i bispemøtet og sansen hennar for litteratur og liturgi, slik at ho alltid er presis i uttrykka sine. Anten det er i preiker eller samtalar, seier han.
Ådnøy har avskilsgudsteneste i Haugesund helga etter påske og i Stavanger domkyrkje 19. april.
Stavanger bispedømmeråd får no i oppdrag frå Kyrkjerådet å nominere minst fem kandidatar til ny biskop.
