Mange studentar må ha jobb ved sida av studiane for å få økonomien til å gå opp. Både jobb og studiar kan derimot vere ein vanskeleg kombinasjon.Illustrasjonsfoto: Håkon Mosvold Larsen / NTB / NPK
Studietida er langt ifrå eit glansbilete
Studiestøtta står meir eller mindre i ro, sjølv om prisane elles i samfunnet aukar. Eit trongt budsjett, høg arbeidsbelasting og etterdønningane av pandemien gjer det langt anna enn enkelt å vera student. Dette er noko studentar ved Universitetet i Oslo kan bekrefte.
– Altså, alle må jo ha ein jobb. For alle veit at det ikkje er mogleg å leve på stipendet, seier student Oda Mo Eikefet (23) til Nynorsk pressekontor. Ho har nett flytta til Oslo frå Trondheim der ho har studert statsvitskap i tre år. Ved sida av å studere media og kommunikasjon er ho praktikant for Stortingsgruppa til Venstre. På grunn av stillingsprosentar tenkte ho først ikkje på seg sjølv som ein vanleg student.
– Men så kom eg på at det er mange studentar som jobbar femti prosent. Både for erfaringa, men mest for pengane.
Med ein snev av ironi fortel ho om korleis det gjekk då ho prøvde å leve på stipendet eit halvt år.
