– Tøft, men nødvendig med inngripande tiltak

Frå og med midnatt og til 23. mars innfører Suldal fleire inngripande smittevern-tiltak, men barn og unge er skjerma.

Suldal har, saman med Etne og Sauda, i dag rådført seg med Folkehelseinstituttet med bakgrunn i at dei er randkommunar til ein nå nedstengt Haugalandsregion.

Gjeld frå midnatt

Utfallet av ettermiddagens møte er ei forskrift som blir iverksett frå og med midnatt, og som legg restriksjonar på suldalssamfunnet. Likevel er Suldals mildare enn tiltaka Sauda har falt ned på, der det mellom anna blir påbode med munnbind for alle over 12 år der ikkje einmeters-regelen kan overhaldast. Då avisa snakka med kommuneleiinga etter møtet i ettermiddag, er forklaringa at Suldal har valt å ta ut tiltak som det alt er tatt høgde for i nasjonale føringar. Likevel ser ordførar Gerd Helen Bø at tiltaka er inngripande i ein smittefri kommune.

– Viktig å skjerma barn og unge

– Bakgrunnen er at det nå er snakk om eit mutert virus som ser ut til å vera meir smittsamt, og at me har eit sjukehus med fleire på intensiven. Eg synest det er tøffe tiltak, men eg trur det er nødvendig, seier Bø, som seier det er viktig for Suldal å skjerma barn. Dermed er det ingen endring for skule-og barnehagedrifta lokalt, og unge under tjue år er gjennomgåande unntatt restriksjonane.

Kallar inn formannskapet i morgon

Formelt er det kommuneoverlegen som har fatta hastevedtaket om forskrifta, og i morgon blir formannskapet innkalt til møte om tiltaka som er følgjande:

*Både Suldal Bad og treningssenter blir stengde, med unntak for rehabilitering for mindre grupper og timeavtalar, samt at skulesymjing også vil halda fram.

*Også museum, kino, teater, konsertstader og tilsvarande kultur- og underhaldningsstader må stengja. Andre offentlege stader som tilbyr organisert kultur, idretts-og fritidsaktivitetar kan berre halda ope for barn og unge og aldersgrensa er sett til 20 år. Det blir også skjenkestopp på serveringsstader.

*Arrangement og private samankomstar på offentleg stad eller i leigde/lånte lokale kan gjennomførast innandørs med inntil ti personar. Private samankomstar utandørs på offentleg stad kan gjennomførast med inntil 20 personar. Arrangement utandørs på offentleg stad kan gjennomførast med inntil 50 personar, heiter det i forskrifta, som understrekar at det er under føresetnad av at avstandsreglar som gjeld blir overhaldne til ei kvar tid.

*Trus-og livssynshus kan halda ope under føresetnad av at desse begrensingane blir gjennomførte. Gravferder kan gjennomførast med inntil 50 personar.

Det er ikkje lov å arrangera verken idrettsaktivitetar eller organiserte fritidsaktivitetar som trening, øving for kor, korps eller liknande for vaksne over 20 år. Barn og unge under 20 kan delta på organiserte fritidsaktivitetar.