Tre kandidatar til å bli ny biskop i Stavanger
Tor Magne Nesvik, Vidar Mæland Bakke og Karen Margrete Mestad er dei tre kandidatane som er att til å bli ny biskop i Stavanger.
Nesvik er prost i Ytre-Stavanger prosti og konstituert domprost, Bakke er sokneprest i Gand kyrkjelyd og Mestad er studieleiar teologi ved VID vitskaplege høgskule, skriv Den norske kyrkja i ei pressemelding.
Tilset 21. mai
Annonse
Til saman kom det inn røystar frå 310 ulike instansar og tilsette i prosessen for å sila ut desse tre i røystingsprosessen, heiter det vidare.
Nå skal både Stavanger bispedømmeråd og resten av biskopane røysta, og dei tre kandidatane skal intervjuast etter tur.
Kyrkjerådet tilset ny biskop i Stavanger bispedømme 21. mai og biskopen blir presentert i Stavanger domkyrkje 22. mai.
(©NPK)
