Elias Hetland, Kristina Nordtømme og Eiril Jensen Isachsen nyt frukosten under blå himmel. Matsalen på campus er stengt. Foto: Nora Bogetvedt Jenssen

TVN-elevane er tilbake på campus

Frå måndag 18. mai klokka 08.10 har det vore full drift på Campus Rygjatun. Nå er over 70 elevar, frå ti av landets elleve fylke, tilbake på Sand og ToppVolley.

– Utruleg godt å ha dei på tunet igjen

Det seier ein smilande dagleg leiar, Kjetil Brekke, der han fredag morgon er i full gang med å servera elevane frukost. Men alt er ikkje slik det var før elevane blei sende heim i mars.

– Nei, den største utfordringa nå er å halda avstand. Det betyr at matsalen er stengt. Elevane får nistepakkar til frukost og kvelds og hentar seg middag i matsalen. All mat blir eten ute eller på romma, fortel Brekke, som er glad kvar dag det er fint vêr, slik at elevane kan eta ute.

Dagleg leiar Kjetil Brekke har morgonskiftet fredag og er i full gang med å servera svoltne elevar frukost. Foto: Nora Bogetvedt Jenssen

Ekstra reinhald

Alle dei tilsette som har vore permitterte, er nå tilbake i arbeid, og Brekke har måtta ta inn ekstra personal til reinhald.

Alle elevane har eigne rom, og dei er fem som deler dusj og do.

– Me forsterkar reinhaldet ved hyppigare vask av sanitæranlegg, dørhandtak og fellesområda, seier Brekke og deler ut nok ei nistepakke, oppskorne grønsaker og mjølk til ein svolten volleyballspelar.

Uroa over all plastikken

Ute på benken sit tre elevar og kosar seg med sein frukost. Det er skulefri, og dei aller fleste elevane har reist på bytur til Stavanger.

Elias Hetland frå Sandnes er snart ferdig med tredje året ved TVN. Han synest det er uvant med dei nye korona-reglane, men meiner det går fint.

– Eg er utruleg imponert over dei som jobbar her, rosar Kristina Nordtømme frå Bergen. Eiril Jensen Isachsen frå Kolbotn er uroa over all plastikken dei nye reglane inneber.

– Det er sjukt mykje plastikk. Alt frå plastikk-eingongsbestikk som er pakka inn i plast, til skjevene me får i plastposar på plast-tallerken.