Dirdalstraen Gardsutsalg er kåra til den beste gardsbutikken i landet

Finalistane som er stemt fram av publikum i løpet av sommaren, har blitt grundig vurderte opp mot kriteria som skal oppfyllast for å kunna smykke seg med tittelen «Norges beste gårdsbutikk».

Vann for andre gong

Etter å ha vore finalistar tre år på rad, var det Dirdalstraen Gardsutsalg i Dirdal inst i Høgsfjorden som trekte det lengste strået, fortel Hanen i ei pressemelding.

Eigarane av gardsutsalet, ekteparet Bente og Tore Hommeland, vann prisen også i 2023. Ekteparet starta opp gardsutsalet i 2020 ved Dirdal kai, der det har vore drive med handel i over 200 år. I dag er lokala restaurerte og ført tilbake til slik det såg ut i 1936.

Eigenproduserte og lokale varer

I gardsbutikken er det utsal av eigenproduserte og lokale varer. Dei sel alt frå marmeladar, ost, krydder, egg, saft, kjøtt og meir til. Det er også mogleg å få kjøpt villaks frå Dirdalselva, Ramnstopølsa oppkalla etter nabonuten og saueskinn frå sauene på garden. Kundar kan også kjøpe garn til Dirdalsvotten og eit breitt utval av lokale og historiske produkt.

Ein god representant for norsk gards- og lokalmat. 

I juryen si grunngjeving heiter det at vinnaren innfrir konkurransekrava om at butikken skal vere ein god representant for norsk gards- og lokalmat. Vinnaren blir rosa for å vera eit førebilete for mange i same bransje og i nominasjonsprosessen blei det trekt fram av kundane at eigarane har eit stort engasjement for ei levande bygd og verdiskaping for lokale bønder.

Ein viktig møteplass

Vidare blir gardsutsalet heidra for å spele ei stor rolle i lokalsamfunnet, ikkje berre som handelsstad, men òg ein viktig møteplass for befolkninga. Juryen meiner at butikken stadig viser evne til vidareutvikling og har ei medviten merkevarebygging med eit gjennomført konsept.

(©NPK)