Vil stoppa postkutt av omsyn til eldre
Pensjonistforbundet mobiliserer medlemmer og tillitsvalde til protest mot regjeringa sitt forslag om å redusera postleveringa til éin dag i veka. Forbundsleiar Erna Ansnes meiner eldre vil bli særleg hardt råka av kutta.
Nesten ein million pensjonistar bur heime, og ein av tre bur åleine.
– Mange har redusert mobilitet og meistrar ikkje digitale løysingar. Regelmessig levering av brev, aviser og offentleg informasjon er derfor svært viktig, seier forbundsleiar i Pensjonistforbundet, Erna Ansnes i ei pressemelding.
Forbundet støttar Fagforbundet sine politiske markeringar landet rundt i dag, måndag, og Ansnes skal halda appell framfor Stortinget.
Ho meiner Posten heller bør vidareutviklast for å styrkja beredskapen, førebyggja einsemd og gjera det tryggare for eldre å bu heime.
(©NPK)