NVE: Energiforbruket i Norge går ned – kraftig auke i straumforbruk frå datasenter
Den samla energibruken i Norge går ned, ifølgje ein ny rapport frå NVE. Samtidig har straumforbruket til datasentera auka med 50 prosent i første halvår i år.
Samla energibruk i Norge gjekk ned 6 TWh frå 2023 til 2024, tilsvarande ein reduksjon på to prosent.
Overgang til elbil
Annonse
Noregs vassdrags- og energidirektorat peikar mellom anna på overgang frå fossilbilar til meir energieffektive elbilar som ei av årsakene.
– Samla energibruk i Norge går ned fordi me har erstatta fossile bilar med meir energieffektive elbilar, og fordi straum frå land erstattar mindre effektive gassturbinar på sokkelen, seier Maren Esmark, seksjonssjef i NVE.
Rapporten ser på samla energibruk, som omfattar alle energivarer i alle sektorar i Norge. Det er straum, fjernvarme, bioenergi, oljeprodukt, gass og kol.
Datasenter trekkjer opp
Annonse
Blant det som trekkjer opp energiforbruket, er datasenter. Her har det vore ein 50 prosents auke i straumforbruk første halvår 2025, samanlikna med i 2024. NVE ventar at straumforbruket frå datasenter vil halde fram med å auka framover, med ei rekke planar om å byggja fleire.
Samtidig har bygningar vorte meir energieffektive, og det er venta ei vidare effektivisering fram mot 2030. Likevel er me ikkje heilt i rute for å nå målet om 10 TWh reduksjon innan 2030.
Ikkje i rute
Målet om 30 prosent reduserte energiintensitet innan 2030 er heller ikkje heilt i rute. Mellom 2015 og 2024 har energiintensiteten i Fastlands-Norge så langt gått ned med 13 prosent.
Energiintensitet måler kor effektivt me bruker energien opp mot den norske verdiskapinga målt som bruttonasjonalprodukt (BNP) for Fastlands-Norge.
