Heit debatt enda med strakspengar til nye skulestolar

Kommunestyret:

Etter ein svært fredsæl årsmeldingsdebatt i kommunestyret, blei det andre bollar då Høgres Sverre Underbakke i går kveld ville ha med dei folkevalde på å løyva 500 000 kroner for å skaffa elevane betre stolar.

– Må vera ombodsmenn også
Stolane på Sand skule har versert som tema i lang tid og er blitt diskutert i både foreldreutval og samarbeidsutvalet, der Underbakke sit.
– Eg veit ikkje om dette er rett måte å gjera det på, men av og til må me vera ombodsmenn og ikkje så formelle, sa Underbakke, som understreka at hans forslag også kunne innebera nykjøp av stolar på andre skular enn Sand.
Svanhild Løge Skålheim (KrF) tente umiddelbart på ideen og ville ha rådmannen på banen om saka.
– Eg finn meg rett og slett ikkje i at ungane skal sitja dårleg!, erklærte representanten.

Ønskte stol-kontroll
Ifølgje administrasjonen er dagens stolar på Sand skule innkjøpte i samråd med fysioterapeut, men nå er oppfatninga blant mange elevar og foreldre at stolane er vonde å sitja på. Angiveleg er samme type også blitt innkjøpte av andre skular i Suldal.
Magne Langeland (Sp) var ikkje lysten på å ta stilling utan å vita meir.
– Eg skulle ønskt at forslagsstillaren hadde bede om ei sak frå rådmannen. Stolane kjem ikkje på plass til skulestart på den måten, men då har me i alle fall kontroll, meinte Langeland og bad om gruppemøte.

Helseproblem
Det blei det til gagns med høg debatt-temperatur. Tilbake igjen på talarstolen, erkjente Langeland at han nå hadde fått meir innblikk i det han karakteriserte som eit helseproblem, men som altså ikkje er komme fram i årsmeldinga. Noko forøvrig fleire politikarar beklaga.
Langeland var klar for å gjera noko med dårlege stolar, men ville be rådmannen utgreia det til budsjettet.

Dårleg spenst?
– Eg er øvegidde over spensten i dette kommunestyret, den er ikkje stor, kontra Underbakke, før SV´s Tormod Skeie kom opp på talarstolen med kompromisset som til slutt blei utfallet. Det inneber at rådmannen til neste kommunestyremøte i juni kjem tilbake med ei utgreiing av stolsituasjonen rundt om på skulane i Suldal, og at kommunestyret løyver inntil 600 000 kroner til eventuelt stolkjøp, som det heiter i vedtaket.

Sp ville stemma SV
– Eg har tenkt å stemma SV, sa ein smilande Langeland då han entra talarstolen der han trekte sitt forslag. Underbakke var på si side ikkje klar for å trekkja sitt forslag, han frykta SVs forslag inneber at det vil ta eit halvt år å få stolane på plass og at skulestart i haust dermed skjer utan nye stolar.
– Eg seier det eg har sagt før, me er gode på tilløp utan hopp, meinte Underbakke, som bad om subsidiær avstemming, så han kunne stemma på sitt eige forslag.

Best på fine ord?
Det gjorde han, og det gjorde også partifelle Rainer Speth og begge Krf sine representantar, Svanhild Løge Skålheim og Jarle Haugsland. Også Nils Bjarne Vold (V) voterte for dette, og han nytta også høve til å konstatera at han synest kommunestyret er flinkare til å snakka i fine store ord enn til å ta ballar når dei er i lufta.
Då Underbakkes forslag var falt, blei Skeie sitt kompromiss einstemmig vedtatt, og han var klar på at han meiner det legg opp til eit løp som gjer at dei elevane og skulane som treng det, skal få nye stolar når skulen startar opp igjen etter ferien.