Bollestad møtte bøndene i Suldal

Det manglar aldri på tøffe tema når bønder i distrikta møter landbruksministeren, og det gjorde det heller ikkje på Østerhus i Fjellet, der familien Haugsland i dag tok imot mat-og landbruksminister Olaug Bollestad (KrF). Ho kom i spissen for ein god delegasjon av partiets fylkestingskandidatar, der suldøl Svanhild Løge Skålheim står på sjetteplass. På Østerhus var også medlemmer av Suldal Bondelag inviterte og, etter kortreist fingermat frå Kulp og høglydt og ivrig drøs rundt bordene, var det tid for alvor.

Ingen søndagsskule
Suldalsbøndene gav klare beskjedar om både sentralisering, pelsdyrnæring, behovet for ein minister som snakkar næringa opp, bekymringa for mjølketrendane og høgst lokale tema, som trøbbel med plastinnsamlinga. Bollestad, som ikkje la skjul på at statsrådposten ikkje er nokon søndagsskule, var klar på at møte med dei som kjenner på kor skoen trykkjer, er viktig kompetansepåfyll. – Det har vore ein svært bratt læringskurve, men det er de som har lært meg opp!

Taletid på bussen
Også Suldal Vekst og Suldal Næringsforening var inviterte til gards, men med strame tidsrammer, fekk dei si taletid på KrF-turnèbussen til Ropeid. Derfrå skulle følgjet vidare til Sauda.

Meir frå møtet i neste papirutgåve.