Så mange blei melde for promillekøyring i Suldal i fjor
Tal frå Utrykningspolitiet viser at 1108 førarar blåste til raudt i Sør-Vest politidistrikt i 2022. Fem førarar blei anmelde for promillekøyring i Suldal.
– Urovekkande og skuffande, seier generalsekretær i MA – Rusfri Trafikk, Elisabeth Fjellvang Kristoffersen i ei pressemelding. Ho peiker samstundes på at tala frå Utrykningspolitiet ikkje viser det heile bildet, og at det reelle talet truleg er langt høgare.
Viktig å vera til stades
Politioverbetjent ved Sauda og Suldal lensmannskontor, Thomas Wahl, kan fortelja at det har vore fleire alvorlege ulukker langs vegane i området dei siste åra, og at politiet derfor brukar mykje ressursar nettopp på trafikken.
Artikkelen held fram under annonsen.
– Me gjennomfører ruskontrollar så ofte me kan, seier han.
Han meiner at tala viser kor viktig det er at politiet er til stades langs vegane.
– Me prøver å overvaka trafikken så godt me kan, og aktlaus køyring vil bli slått ned på.
Farleg utvikling
MA – Rusfri Trafikk, ein organisasjon som jobbar for færre drepne og hardt skadde av rus i trafikken, er svært bekymra for utviklinga.
– Tala frå Utrykningspolitiet viser at mengda ruskøyrarar har stege. Det gir sjølvsagt stor grunn til bekymring. Spesielt når me har tala på omkomne i bakhovudet, seier generalsekretær i organisasjonen Elisabeth Fjellvang Kristoffersen.
