Klare for folkefesten

Klar melding ut frå arrangørane: Nå er det berre til å komma seg ut og oppleva Ryfylkedagane tre dagar til ende.

Det er eit innhaldsrikt program dei serverer, så dei som har planar om å få med seg alt, bør kanskje leggja seg til lading allereie i dag.

Hawai-feeling i sanden

Fredag morgon startar moroa. Forutan shopping og gode kjøp å gjera i butikkane, er det mykje å velja i. Ungdommane frå 13 til 17 år får kjenna på beachviben på sandvolleybanane. Vêrmeldinga lovar sol og 17 grader.

– Det er gratis inngang og servering av grillmat, her blir det Hawai-feel, lovar leiar i Sandsgruppa, Bonolo Ramphomane-Aandahl.

Lyrikk, trubadur og Coldplay

Ryfylkemuseet opnar ny utstilling Fuglar i lyrikken, på Nesasjøhuset, og på Ryfylke Fjordhotel er det både grilling og uteservering, før dei startar pubkveld. 40 songarar frå Songarlaget, forsterka med eige orkester og solistar, byr på Coldplay-konsert, både fredags- og laurdagskvelden. På Sjøhuset lovar dei både feststemning og trubadur.

Klatring, klovn og kunst

På den store marknadsdagen er handelsstanden klar med gode tilbod, og programmet viser eit hav av ulike arrangement. Forutan handlagsdag på Kolbeinstveit, opnar Turistkontoret i Gata for sesongen, og Røde Kors lokkar med både konkurransar og andaløp. Klatreklubben utfordrar til konkurransar med fine premiar, sanitetsforeininga har loppemarknad, og på Mimrestova kan ein forvitna seg i foto frå 1978, som gamleredaktør Roy Høibo har knipsa. Utover dagen dukkar klovnen Charlie opp, Suldal Kunstlag opnar sommarutstillinga, og endene skal kappast ned elveosen.

Hysterisk allsong

Men det er ingen grunn til å gå heim etter at endene er i mål. Då kan ein svinga seg i T-dans på Sjøhuset med hysterisk allsong, oppleva ny konsert med Songarlaget eller chill -lounge live med Amelie Aldner på Brunsj i Gata. Trubaduren på Sjøhuset skal laga stemning utover natta.

Olavsrosa, korpskonsert og grilldag

Er det meir krutt igjen, er det berre å ta turen til Kolbeinstveit og kranselag med mat og drikke, tonesett av folkemusikk, før turen kan gå vidare til Hamrabø og Børkjenes gard. Der får vertskapet utdelt kulturarvprisen Olavsrosa. Tradisjonen tru, varmar dei opp grillane på Nesflaten og inviterer til grilldag. På Suldal Bad er det familiebading, og sist men ikkje minst, spelar korpsa i kommunen, med besøk av Rogaland ungdomskorps, opp til korpskonsert på Kulturhuset.

– Få med at det er fleire utstillarar enn nokon gong under marknadsdagen, oppmodar Maren Landsnes i arrangement-komiteen og legg til at det kan vera lurt å studera programmet nøye så ein ikkje missar ut på noko av alt det kjekke.