Min finaste påsketur: Fottur til Kammen
Helen Moen Gjuvsland slår eit slag for sjønært og vårkjensla.
Kor går din finaste påsketur Suldal?
– Eg vil slå eit slag for ein tur som både er sjønær og gir vårkjensle. Fottur og utsikt frå Kammen i Erfjord er flott. Turen er ikkje tilrettelagt, men veldig fin med at den passar for alle aldrar og kan forlengast med ein ekstra rundtur. Du får flott utsikt ved turmålet.
Annonse
Kor startar turen og kor sluttar den, og eventuelt kor lang tid brukar du?
– Du parkerer rett etter Ytre Sandviktunnelen i retning Foreneset. Der ser du det litle kioskbygget på høgre hand der du skal parkera. Like etter kiosken svingar du av vegen. Derifrå går turen på skogsveg, før du går over til sti.
Er den godt merka og er det lett å finna fram?
– Det er lurt å studera kartet og himmelretning før du skal gå turen, då mobildekninga er litt dårleg i området, og det er skogsvegar som kan skapa litt usikkerheit. Du finn skilt til både Kammen og Vardeheia langs skogsvegen.
Annonse
Kvifor er akkurat denne turen blitt ein favoritt?
På Kammen kan du nyta flott utsikt, og er du heldig har du godt med sol til nista heile dagen. Solnedgangen der er ekstra fin. På heimveg kan du gå ein runde til Vardeheia. På Kammen har eg overnatta i hengjekøye og hatt med stormkjøkken. Det står òg bord ved postkassen der du kan skriva deg i boka.
Kva har du med deg til niste når du er på tur?
-Pizza, pastarett eller havregraut med stekte eple og mandlar i godt med smør, sukker og kanel er fin turmat på Kammen viss du vil gjera det til meir enn ein trimtur.
