EUs klimateneste: Oktober var rekordvarm

Den globale snittemperaturen var i oktober 1,75 grader over førindustrielle nivå, den tredje månaden på rad der snittemperaturen er over 1,5-gradersmålet.

Det er også «nesten sikkert» at 2026 blir det nest varmaste året som er målt i historia. Sjansen for at 2026 blir endå varmare enn rekordåret 2024 er 20 prosent, ifølgje Copernicus.

Snittet går truleg over 1,5-gradersmålet

Snittemperaturen vil «nesten sikkert» enda på 1,5 grader over førindustrielt nivå for perioden mellom 2023 og 2026, blir det også slått fast.

Blant måla i klimaavtalen som blei vedteken i Paris i 2015, er å avgrense den globale oppvarminga til 2 eller aller helst 1,5 grader over førindustrielt nivå, eit mål FN i september erkjende at truleg ryk.

I Europa var oktobermånaden den nest varmaste som er registrert, med særleg høge temperaturar i Skandinavia.

– I kontrast til september og mykje av sommaren var temperaturane mest over snittet i Aust-Europa og Skandinavia, medan mykje av det vestlege og sentrale Europa opplevde mindre varmeavvik, skriv Copernicus.

Varme hav

Også havtemperaturane var eksepsjonelt høge i oktober.

Snittemperaturen i havoverflata utanfor polarområda var 20,95 grader, også det toppnotering for oktober. Den førre oktober-rekorden kom i 2023.

– Oktober har halde fram mønsteret med oppsiktsvekkjande global hete, med rekordhøge globale og havoverflatetemperaturar, seier Samantha Burgess i den europeiske meteorologiske organisasjonen ECMWF, som har ansvaret for klimaovervakingstenesta.

Ho legg til at ein «eksepsjonelt sterk» El Niño «legg ytterlegare varme til eit klima som allereie blir varma opp av menneskeleg aktivitet, medan 2026 ligg an til å bli det andre kalenderåret som overstig 1,5 grader».