Min finaste påsketur: Grønhovet, 843 moh.
Henning Barka frå Jelsa har gjort hyttesuldøl av seg, og her slår han eit slag for ein påsketur av den litt kortare varianten.
Kor går din finaste påsketur Suldal?
– Nå er me akkurat blitt hyttesuldøler også, så frå basen på Jelsa går nå turen endå oftare til Mosvatnet og området rundt Gullingen. Eg vil slå eit slag for kortare turar. Det er dei turane som verkeleg blir noko av som er best. Ein tur me har gått både sommar og vinter er turen til Grønhovet (843 moh.), som altså er veslebror til Gullingen (979 moh.)
Annonse
Til fots eller på ski?
– Sist gjekk me opp på truger.
Kor startar turen og kor sluttar den, og eventuelt kor lang tid brukar du?
– Anbefalt tid er to timar tur-retur, og lengda er 2,5 kilometer i relativt bratt terreng. Turen er merkt frå leirskulen. Derfrå er det meir variert terreng men det blir tydeleg etter kvart at ein skal opp i høgda. Frå den turen de ser på bilda, gjekk Lillie og meg opp langs skitrekket på grunn av mildvêr og usikre føreforhold. Då brukte me truger med ispiggar. På toppen får ein flott utsikt over Mosvatnet og toppane rundt.
Annonse
Kvifor er akkurat denne turen blitt ein favoritt?
– Dette har blitt ein hyppig besøkt topp av oss sidan den er relativt kort. Ein får raskt kjensla av å vera på høgheia, og utsikta på ein klår dag er berre fantastisk. Ein kan sitja på toppen å drøyma seg vekk til lengre turar i Suldalsheia. Reinsnuten neste helg?
Kva har du med deg til niste når du er på tur?
– På ein slik kort tur er nistepakka tilsvarande. Me har alltid med nødproviant i form av sjokolade, nøtter og vatn. Skal me vera lengre tid ute er pannekakerøre på termos og stormkjøkken alltid med.
