Min finaste påsketur: Langs Suldalslågen på Sand
Turid Børtveit Skjelstad tipsar om ein tur som er fin heile året, frå Garaneset til Litlehaga bru.
Kor går din finaste påsketur Suldal?
Annonse
– Turen på 2,5 kilometer frå Garaneset til Litlegaga bru er fin heile året, ikkje berre til påske.
Kor startar turen og kor sluttar den, og eventuelt kor lang tid brukar du?
– Ein kan parkera på Garaneset. Ved Tjelmane bru står det skilt til Litlehaga bru. Stien er lett å sjå og er merka undervegs. Det er tilrettelagt med heller, bruer og trapper. Deler av vegen går ein på gardsveg. Ein kan gå heile turen, bortimot 5 kilometer, som rundtur eller korta han ned ved å gå gjennom gardstunet på Haua eller ta avstikkaren til gang -og sykkelstien nedanfor Falkhaug (merka med skilt)
Kvifor er akkurat denne turen blitt ein favoritt?
Annonse
– Eg likar denne turen godt sidan han er så variert både i landskap og plante- og dyre/fugleliv. Heile tida langs med elva, gjennom skog, opnare landskap ved Kuleholmen, frå heilt flatt til kupert og litt bratt på slutten. Det er spennande å sjå kva tid kvitveisen kikkar opp om våren og til slutt dekker heile skogbotnen. På sommaren er det fargerike markblomar deler av turen. Det er fleire stader tydelege spor etter beveren som har felt tre, og ofte ser eg fossekall eller andre både små og store fuglar.
Kva har du med deg til niste når du er på tur?
– Eg har som oftast ikkje niste med meg på denne turen, men om eg har det kan eg nyta maten på ein benk undervegs. Turnista mi består av heimebakte grovskiver, som oftast med kvit- eller brunost. Kakao eller kaffi og ei flaske vatn må eg ha med, og kanskje ein sjokolade og eit eple.
