Bildet viser brukarar på dåverande Vinjar bu-og omsorgssenter ute på tur med hest og kjerre som i 2022 stod på menyen på dagsenter-tilbodet.

 Dugnaden og pengebingen

Publisert Sist oppdatert

Det er ikkje fritt for at tanken vil vandra, eller skal me seia flyga, til Andeby og den søkkrike onkel Skrue. Den fjørkledde krøsusen som elskar å bada i rikdommen sin og som utan å rødma, kjipar det han kan i dei nære relasjonane om det finst ei krone å spara.

Onkel Skrue er rik, men det er på pengar.  

Dei fleste i både Andeby og den verkelege verda vår, veit at det finst verdiar ikkje kan reknast om til mynt. Som verken kan eller bør brukast til noko anna enn gleda over det som gjer verdien verdfull.

Me menneske har mange vakre og varme fenomen i og mellom oss som ikkje skal inn i noko rekneskap; rett og slett fordi dei visnar når dei blir forsøkt tasta inn på ein kalkulator.

Dugnadslyst er eitt av bygdas finaste og beste særtrekk. Ein kan berre beundra og la seg forundra over korleis menneske, som elles også ofte har travle liv, lar time etter time gå med i ubetalt innsats til glede og nytte for andre og for fellesskapen.

Det gode og glupe med dugnad er at den gir meining og glede begge vegar. Den er driven av ein utanomjordisk økonomi som handlar om meining og lyst, men den kastar av seg ein arbeidsinnsats som sjølvsagt kan omreknast i pengar.

Det har administrasjon og politikarar i Suldal sett og ser føre seg at frivillig innsats skal berga dagsenter-drifta så kommunale kroner kan knipast.

Suldal skal spara og effektivisera, og vegvisar nummer ein er skiljet mellom det kommunen må og det kommunen kan. Samvær, middag og drøs for gamle heimebuande ligg sjølvsagt lageleg til for hogg. Det er ikkje lovpålagt, som jo i seg sjølv er underleg, når ein tenkjer på kor mykje einsemd-motgift og førebygging eit samfunn og ein kommune får for ein liten penge.

Kommunen driv elles med plenty av ting som ikkje er lovpålagt, men når det handlar om ny omdømmebunad eller kraftposisjonering, er det samfunnsaktøren Suldal som svingar seg, og det blir kanskje noko anna?

Heilt samme scwhungen er det ikkje over kvardagslege treff for aldrande suldøler. Dei folkevalde anerkjenner at tilbodet er viktig og bra. Men i staden for å løyva pengane, prøver dei å leggja sparekniven på frivilligstrupen for å få i både sparepose og dugnadssekk.

Heilt på høgde med han som sym i pengebingen med flosshatten på mens dei nære og kjære er sende ut på arbeid for å gjera pengehavet større.

 

 

       

Powered by Labrador CMS