Kor er skulesjefen?

Leiar

Organiseringa av skuleveka er eit gloheitt tema i Suldal.
Det er kultur mot pedagogikk, det er tradisjon mot moderne tider, for somme er det familiens fridom mot det offentleges styring.
Det var eit engasjert kommunestyre som sist veke hadde saka til behandling; det er bra at mange representantar går på talarstolen og bidrar til at kommunens øvste organ framstår livskraftig.
Fleirtalet av dei folkevalde vil at det i denne omgangen berre er Sand skule som innfører femdagars veke i småskulen og at dei andre grendene får venta til foreldra vil. Faktisk er det berre Ap som synest det er ein god idé å innføra femdagarsveke for alle skulane.
Eller rettare, det er ikkje berre Ap som synest det er ein god idé, men det er berre Ap som stemmer for det.
Nesten alle som gjekk på talarstolen under debatten, sa seg samde med Kari Vaage Gjuvsland (Ap), som argumenterte for at det som er godt for ein skule, også må vera godt for ein annan, når det kjem til pedagogikk.
Likevel, fleirtalet vel å leggja mest vekt på det foreldra vil. Tone Mari Sand (SV) gjekk så langt som å spå at skulen kan enda opp med læringstrassige barn dersom kommunen trassar foreldreviljen og omkalfatrar på dagens skule-fri.
Fleksibilitet og foreldresamarbeid er fine og viktige kvalitetar i ein skule, men det er misforstått konfliktvegring å overlata styringa av skulen til ei handfull foreldrerepresentantar.
Ei femdagars skuleveke riv ikkje vekk foreldres fridom til å ha ein fridag med seinare levering og kos i heimen når barna kjem heim, men det er private val.
Skuleeigaren, kommunen, kan ikkje abdisera frå å styra skulen etter det dei meiner er dei beste pedagogiske prinsippa av omsyn til folks fritidsplanar.
Det er mange ting som talar for at femdagarsveka er bra for dei minste elevane også, og i alle fall må barna i Suldal få det same skuletilbodet, uavhengig av kva grend dei bur i.
Esther Moe
Redaksjonsleiar