LESARBREV: Bygda og brukaren må vera i fokus – uavhengig i kva for sentrum …

Framtidas omsorg engasjerer – det er bra!

Berit Heggelund har i sitt innlegg, SP 15. januar, ein del meiningsytringar som gjer det unødvendig å stadfeste kvar avsendaren er busett… Ho skriv at; «når ein sette i gang denne prosessen med framtidas omsorg, var det sparing og å samla alt på Sand som var målet.» Vidare at; «Så vart det plutselig, «hals øve håve», vedtatt at demenssenteret, Suldal Omsorgssenter, skulle liggja på Suldalsosen.»

Eg kommenterer ikkje påstandane, anna enn at eg gler meg over at me har demokratiske prosessar der folkevalde politikarar gjer vedtak som er tufta på kunnskapar og føresetnader, kjende i stunda vedtaka blir gjort. Det ville sett underleg ut i distrikta våre dersom berre økonomiske- og egoistiske tankesett skulle få styre landet…
Mykje takk vera ei brei geografisk fordeling av folkevalde i Suldal, har me framleis tåleg god fordeling av det kommunale tenestetilbodet. Det har meir enn éin gong vist seg at det faktisk er heilt naudsynt – og svært viktig – å drive distrikts- og utkantpolitikk, òg internt i utkantkommunen Suldal.

Nå skal kommunestyret gjere eit svært viktig vedtak, eit vedtak som kan medføre at ein legg alle institusjonsplassar for framtidas omsorg under eitt tak – på Sand eller på Suldalsosen. Då er det – i tillegg til dei praktiske sidene for brukarar og tilsette – òg andre konsekvensar som må vurderast. Rådmannen skal (med ROS-analyse…?) gi kommunestyret oversikt over om vedtaket vil ha konsekvensar for m.a. brannberedskap (NB!), busetnad og næringsliv i den grenda ein vél/ vél bort…
Tilstandsvurderinga for Suldal sjukeheim tilseier ikkje akutt krise (Les; den korkje veltar eller flyt av garde…) enno.
Gjer ikkje dette at me kan tenkja trinnvis tilnærming, der ein planlegg med lenger horisont?

Kan, til dømes, Suldal omsorgssenter (demenssenter, vaskeri og kjøkken) byggjast på Suldalsosen med ferdigstilling t.d. 2023-2024? Så kan ein bruke tid på vidare detaljplanar for Suldal sjukeheim, òg plassert på Suldalsosen, til dømes klar til innflytting 2027-2028. Dette vil gi eit heilt anna økonomisk resultat enn dersom ein finn på å byggje alt på ein gong.
For å få dette til, er ein avhengig av gode, langsiktige vedtak – vedtak som står seg lenger enn ein periode eller to… Slike langsiktige vedtak, er eg viss på at sitjande kommunestyre er i stand til å gjere, inkludert for framtidas omsorg – noko som vil gi rådmannen arbeidsro i lange tider.

Heggelund peikar sjølv på sentraliseringa som er i gang i Suldal – som er viktig å arbeide mot. Med eit godt, langsiktig vedtak, som medfører at ein samlar den institusjonelle delen av framtidas omsorg på Suldalsosen, vil det verkeleg vera eit vedtak som vil gjere sitt til å bremsa sentraliseringa.
Eg meiner framleis Sand skal vera eit sterkt kommunesenter, men eg tenkjer at Sand vil merke mindre at sjukeheimen blir flytt til Suldalsosen, enn Suldalsosen vil merke at Suldal omsorgssenter blir flytta til Sand. Og brukarane tenkjer du…? Dei vil framleis vera i sentrum for funksjonen av bygningane – og få svært gode tenester – uavhengig av kva sentrum ein vel.

Så, kjære politikarar, de er valde inn av folket for å prestere det som – i sum – gagnar best for heile Suldal. Stundom er det smart å motverke tyngdekrafta… Då gjer det ikkje så mykje om det går litt prestisje i saka…

Suldalsosen, 2. februar 2020
Endre Kvæstad

Endre Kvæstad