LEIAR

– Vel er me sindige i indre Ryfylke, men det går ei grense.

Publisert Sist oppdatert

Vel er me sindige i indre Ryfylke, men det går ei grense. Sjølvsagt og heldigvis kokar det når det er klart korleis fylkesrådmannen ser føre seg at hurtigbåt-kutta skal løysast.

Kort fortalt går det ut på først å strama repet rundt båttilbodet inn fjordane, for deretter å formeleg kappa båt-trossa til indre Ryfylke. Hebnes er spart, men Jelsa, Sand og Sauda er frå 2023 raderte ut som stoppestader i oversikta fylkesrådmannen legg fram for samferdsleutvalet i dag.

Nå er det ikkje slik at fylkesmannen og Kolumbus, som har utarbeidd tilrådingane som ligg til grunn for saka, plutseleg har fått eit vondt auge til hurtigbåt-tilbodet i Ryfylkebassenget. Kuttforslaga er ein konsekvens av finansieringsproblemet fylket har fått som følge av ein endra kostnadsnøkkel i departementet.

Ein kostnadsnøkkel mange fylke får det betre med, men som for Rogaland blir det motsette av ein nøkkel, nemleg kroken på døra for ei livsnerve.

Problemet er ikkje skapt i Rogaland. Men det er her det enn så lenge må løysast, om ikkje staten plutseleg kjem med ei bergande hand for det druknande båttilbodet.

Dermed er det høgst betimeleg å stilla spørsmålet om kven som skal ta dei tyngste børene og dei djupaste kutta og kvifor. I sitt notat konstaterer Kolumbus at dei først og fremst skånar lovpålagt skuleskyss, deretter stader utan fastlandsforbindelse.

Så kjem unntaka. Det første er Judaberg, som jo er landfast. Kva kan grunngivinga vera? Jo, kan Kolumbus røpa; det er grunna Judabergs «strategiske plassering i Ryfylkebassenget».

Strategi er eit imponerande ord, med assosiasjonar til klare tankar og militær planlegging, men kan det vera at strategisk her berre betyr bynært?

I festtalar og visjonar er heile Rogaland viktig, anten det gjeld reiseliv eller verdiskaping. Det strategiske er vel å sørga for at den læra blir til liv og båtruter.

Powered by Labrador CMS