Yrke og utdanning: YSK - ja takk, begge fordeler!
– Heilt fantastisk! Slik omtalar førsteårsstudent Espen Skålheim det eksklusive utdanningstilbodet som Sauda vidaregåande skule tilbyr. Etter fire år står han att med både fagbrev som industrimekanikar og spesiell studiekompetanse. Han var ikkje vanskeleg å be då Suldalsposten tok kontakt for å prata om hans yrkesval.
– Viss eg kan bidra til å framsnakka YSK, blir eg sjølvsagt med.
Genialt konsept
– Kvifor valde du YSK, Espen?
– Eg var nok litt skulelei og usikker på kva eg skulle bli då utdanningsvalet skulle takast for eitt års tid sidan. YSK gir meg fire ekstra år til å finne ut kva eg vil. Då er eg ferdig utdanna industrimekanikar og sit med spesiell studiekompetanse som opnar opp for høgare utdanning, om eg vil det. Eit genialt konsept, spør du meg.
– Korleis ser ei normal veke ut for deg?
– Dei tre første åra går eg tre dagar på skule og to dagar på arbeid. Fjerde året blir det motsett, altså tre dagar jobb og to dagar skule i veka.
– Kva fordeler ser du med YSK?
– Mange! Eg likar balansen mellom skule og arbeid, det gjer at me lærer på ein heilt annan måte. Ein blir meir fokusert i teorifaga då me berre er på skulen tre dagar i veka, samt at programfaga gir meir meining når ein kan relatera det direkte til jobb. Då blir teorien mykje enklare å forstå. Alt blir meir interessant når ein skjønar det heilskapelege biletet av utdanninga, på YSK får me rett og slett ein breiare forståing, meiner eg.
– Kva arbeidsoppgåver har du på Statkraft?
– Alt mogleg. Oppgåvene er lagt opp slik at eg kan læra mest mogleg. Eg er vel mest saman med mekanikarane her, sidan eg skal bli industrimekanikar. Det går mykje i sveising, laging av deler, feilsøking, montering av pumper og filter. Det er viktig å presisera at eg kunne ingenting om dette faget då eg starta i haust. Her startar ein på null og veks med oppgåvene. Alt blir berre kjekkare og meir spennande etter kvart som kunnskapen min blir utvida.
– Kva likar du best på arbeid?
– Det er så mykje! Stadig nytt, spennande og variert arbeid, synest eg er veldig kjekt. Så er det jo ein veldig sosial og kjekk gjeng her då, og det er berre heilt topp. Eg kjende meg inkludert frå dag ein. Eit knakande bra arbeidsmiljø rett og slett!
– Kva med den lange skuleferien som du mister?
– Akkurat det gjer med ikkje så mykje. Fem veker ferie i året er heilt supert det. Eg har alltid hatt sommarjobb, men nå treng eg ikkje stressa med det. Nå har eg sommarjobb som er relevant og kjem meg til gode seinare. Medan venene mine må jakta sommarjobb frå år til år, kan du sjå på det som at eg har sikra meg dei neste fire åra.
– Planen vidare?
– Eg er framleis litt usikker, men det stressar eg ikkje med. Innan eg er ferdig, har eg både fagbrev og studiekompetanse, ein kombinasjon som ofte er ettertrakta i arbeidesmarknaden. Fokuset ligg på det eg driv med nå, så får me sjå når tida er inne for å ta neste val. Men Forsvaret har alltid fascinert meg, så eg håpar på ein tur innom der på vegen, i alle fall.
Det går mot endt arbeidsdag i Prestavikjo på Suldalsosen. Drøsen går lett mellom kollegaane, og det er lett å merka at Espen er ein del av gjengen.
– Nå er det heim til dusj og ferdig middag, smiler han og legg ikkje skjul på at det er herleg med eit avbrekk frå studenthybelen i Sauda nokre dagar i veka.