Amedia tek over avisa Hordaland

Amedia tek over avisa Hordaland på Voss. Kjøpet gjeld i tillegg Vaksdalsposten og Hordaland Trykk og Distribusjon.

– Dette understrekar hovudføremålet vårt som utgivar. Å utvikla lokalavisjournalistikken og sikre mediemangfaldet i heile landet, seier regiondirektør Svein Atle Huus i Amedia i ei pressemelding

Endå tettare samarbeid

Han viser til at Hordaland er ei tradisjonsrik avis med godt fotfeste i dekningsområdet sitt, og at det same gjeld Vaksdalsposten. Begge har vore partnaraviser i Amedia sidan 2021.

– Me er godt kjende med dei frå før. Og dei er godt integrerte i Amedia sin driftsmodell og tek mellom anna del i samarbeidet vårt med stoffutveksling. Nå gler me oss til å jobba endå tettare med dei dyktige medarbeidarane der, legg Huus til.

Styreleiar Ida T. Sætersdal i Amedia minner om at me er inne i ei krevjande tid for mediebransjen, og at det er vanskeleg å stå åleine som ansvarleg eigar i ei tid der teknologien er i rivande utviklinga og brukarvanane er i rask endring.

– Eg er trygg på at dette salet vil gi både avisene og trykkjeriet eit solid og godt grunnlag for vidare utvikling, seier ho.

Trygge på Amedia

Også dei tidlegare eigarane er nøgde med avhendinga.

– Gjennom fire generasjonar har det vore viktig for oss som etterkommarar av Lorentz Nybø å vidareføre verdigrunnlaget frå oppstarten i 1883. Familien har i alle år vore aktivt med i drift og styre. Dette gjeld også for Vaksdalsposten etter at avisa vart kjøpt opp i 2011. Det har vore ei stor glede å bidra til det viktige samfunnsoppdraget som lokalavisa har, og me er trygge på at Amedia kan vidareføre den stolte avistradisjonen på ein framtidsretta måte, seier eigar og nestleiar i konsernstyret, Knut Bergo, på vegner av dei tidlegare eigarane.

(©NPK)