Folgefonna blir lågare
Folgefonna har fått ny offisiell høgd på det høgaste punktet: 1645 meter over havet. Det er tre meter lågare enn førre offisielle høgd.
Det skriv Kvinnheringen som har fanga opp ei e-postutveksling mellom Den Norske Turistforening og Kartverket der den nye høgda blir presentert.
Fotogrammetri
Ifølgje Trond Eilev Espelund hos Kartverket, vert høgda berekna etter det ein kallar nykonstruksjon.
Artikkelen held fram under annonsen.
– Nykonstruksjon vil seia at terrenget vert konstruert på ny i ein digital arbeidsstasjon etter nye digitale flybilde med fotogrammetriske metodar. Flybilda har ei overdekning på 60 prosent i flystriperetninga og cirka 10 prosent i sideretninga. Dermed er eitt og same bildepunkt å finna i minst to flybilete tekne frå ulik posisjon. Slik kan høgde og posisjon til punktet utreknast ved bildestråleskjering, forklarar Espelund til Kvinnheringen og oppmodar spesielt interesserte til å lesa seg opp på det som heiter fotogrammetri.
(©NPK)
