Framsnakkar lærlingvegen
– Ved å gå yrkesfag og å bli lærling, lærer du noko som vil gi deg glede resten av livet.
Desse to blide opplæringskonsulentane kan ikkje snakka godt nok om det å bli lærling. Bente Kjos-Wenjum og Hans Sæter møter dei fleste lærlingane i Ryfylke, iallfall dei som har avtale med opplæringskontoret.
Fornuftig val
Opplæringskontoret Rytopp har medlemsbedrifter frå Sauda i nord, til Forsand i sør. Alle Ryfylke-kommunane er medlemmer, i tillegg til ei rekkje private bedrifter. Cirka 140 lærlingar har lærekontrakt med Rytopp, og lærlingane er fordelte over fleire faggrupper.
– For dei som ikkje veit kva dei vil bli, er yrkesfag eit bra val. Då kan du bli noko mens du tenkjer deg om, seier Kjos-Wenjum og legg til at ein samtidig får læra noko ein har glede av resten av livet. Ho trekkjer fram tømrarfaget som eit eksempel og meiner at om ein ikkje vil fortsetja som tømrar resten av livet, har ein likevel gjort noko fornuftig og samtidig tent pengar på det. Ho reknar at lærlingar tener ei vanleg årsløn i løpet av tida dei går i lære.
Bygg, anlegg og industri
På spørsmål om kva yrkesretta retningar det kan vera lurt å tenkja om ein bur i Suldal eller Sauda, har duoen ei rekkje forslag.
– Bygg og anleggsbransjen, alt frå maskinførar og tømrar, til mur- og betongfag er bankers. Startar ein vg1 på bygg og anlegg, har ein store moglegheiter, meiner Sæter.
Også i industrifag, som er meir mekanisk retta, som kjemiprosess, platearbeidar, CNC-operatør og energimontørfaget, meiner dei det er lett å få både læreplass og jobb etter endt fagprøve.
Helsefag og nye vegar
Kjos-Wenjum trekkjer fram helsefag, der det framover vil vera store behov for faglært arbeidskraft. Ho minner også om at etter fagbrevet, er det berre eitt år i tillegg, som skal til for å få studiekompetanse, om ein vil gå vidare på lengre utdanning. Noko som er relativt nytt, er eit nettbasert opplegg der dei som er i full læretid kan ta nettbasert studiekompetanse.
– Dette er ein veldig interessant veg, men endå er det berre på prøvestadiet.
Lurt på lærlingvegen
For dei som er ferdige med to år på vidaregåande og er på veg til å finna lærlingplass, har dei også tips å komma med;
– Tidlegare arbeidserfaring, som ekstrajobbar, er god erfaring å ha med seg i møte med bedrifta. Likeeins om ein har referansar på CV'en. Oppsøk bedrifta, ta kontakt og vis interesse, rår dei to opplæringskonsulentane til.
Under læretida følgjer dei lærlingane opp både med ulike kurs, fagdagar og individuell oppfølging.
– Ta kontakt med oss på yrkesmessa i Suldalshallen, er siste beskjed ut til alle som lurer på om yrkesretta utdanning er noko å satsa på.