Her er råda for vinterferien

Helsedirektoratet og Folkehelseinstituttet har utarbeidd nasjonale tilrådingar om korleis vinterferien kan planleggjast og gjennomførast på ein smittevernfagleg forsvarleg måte.

Generelt

* Det er viktig å halde seg heime viss ein ikkje er frisk, og teste seg så snart som mogleg viss ein trur ein er smitta med covid-19.

* Alle må vere førebudde på å endre planane for vinterferien dersom det oppstår lokale utbrot anten der du bur eller dit du skal reise. Då vil det kunne komme nye lokale råd og reglar ein må ta omsyn til.

Reiser

* Reiser til utlandet blir rådd mot.

* Du kan reise på hytta (eid eller leigd) eller hotell innanlands, men unngå kollektivtransport viss det er mogleg.

* Viss du skal bu på hotell, må du vere førebudd på å gå i karantene til situasjonen er avklart viss det blir eit smitteutbrot der. Hald avstand til andre gjestar og følg smittevernreglane i hotellet.

* Det er viktig at du set deg inn i og følgjer smittevernreglane som gjeld der du skal vere.

* Personar som reiser til kommunar med mindre strenge tiltak, bør som ein hovudregel følgje tilrådingane som gjeld i kommunen dei bur i til vanleg. Viss det til dømes i heimkommunen din er krav om å bruke munnbind, bør du derfor gjere det i dei same situasjonane òg i kommunen du reiser til, sjølv om dei ikkje har eit tilsvarande krav.

Sosialt

* Alle bør redusere talet på personar ein har kontakt med, og vere saman med få personar i sosiale samanhengar, i kortare tid og ikkje med for mange ulike personar på ei veke. Ein bør fortrinnsvis samlast utandørs, der er smitterisikoen mindre. Viss nokon er i ei risikogruppe, bør det takast ekstra omsyn.

Besøk

* Dei nasjonale tilrådingane som gjeld for besøk heime, gjeld òg ved besøk til til dømes hytta i vinterferien. Det betyr at det blir oppmoda om å møte andre utandørs, og ikkje ha besøk av fleire enn fem gjestar i tillegg til dei som er i husstanden din, så lenge du kan halde minst éin meters avstand til gjestene til kvar tid. Dersom alle gjestene kjem frå same husstand, kan ein vere fleire.

* Avgrens overnattingsbesøk. Tilrådinga om talet på gjester på besøk og avstand gjeld òg for overnatting. Personar frå ulik husstand bør ikkje dele soverom. Sørg for god hygiene og godt reinhald viss personar frå ulike husstandar må dele bad. Meteren gjeld på hytta òg, og det avgrensar moglegheita for overnattingsbesøk for dei aller fleste.

Butikkar og aktivitetar

* Handle det du treng på turen i heimkommunen din før avreise. Viss du må handle nødvendige varer andre stader, vel tidspunkt når det er lite folk, og gå helst berre éin frå husstanden.

* Vel helst aktivitetar som går føre seg utandørs. Ved besøk på alpinanlegg, badeland eller andre stader, må ein følgje smittevernrådet for verksemdene.

* Unngå i størst mogleg grad å oppsøkje stader der mange er samla og det ikkje er lett å halde avstand, slik som serveringsstader og skistover.

* God handhygiene og avstand til andre gjeld heile tida.

(©NPK)