Ikkje alle kan velja
Denne saka stod på trykk i Suldalsposten 21. oktober 2006
Me har det godt og misunner ikkje hjelpemannskapa i ”Legar Utan Grenser” forholda dei arbeider under, seier Bjørn Benninghoff og John Owe Mikkelsen, som disponerer ny ambulanse med topp utstyr .
Fjernsynet har køyrt reportasjar frå Afrika som viser arbeidsforholda hjelpepersonellel til ”Legar Utan Grenser” arbeider under. Det var med biletet av ein ung mann på netthinna at me komponerte scenen med ambulansen, bøsseberarane og tilhengaren.
Artikkelen held fram under annonsen.
Legar utan grenser
Med biletet av ein ung afrikanar som for ope kamera blei båre inn frå markene, med blødande beinstump etter å ha tråkka på ei mine. Som fekk førstehjelp på terrassen, for så å bli frakta to timar bakpå ein biltilhengar. Humpande bortetter det som i Suldal knapt ville tent som gardsveg. Til ”Legar Utan Grenser” sitt feltsjukehus. Både Benninghoff og Mikkelsen har fleire års erfaring bak ambulanserattet.
– Me ser opp til dei som arbeider for ”Legar Uten Grenser”. Dei gjer ein beundringsverdig innsats, og me vonar folk i Suldal støttar TV-aksjonen, seier dei.
Fullt mannskap
Rutt Herabakka og Halldis Leverskjær koordinerer innsamlingsaksjonen på Sand og i Erfjord og kan opplysa at heile Suldal er dekt inn med bøsseberarar. Kvar einaste husstand i kommunen får folk på døra. For ikkje å kollidera med arrangement på Kulturhuset, går bøsseberarane på Sand førmiddagstid. I tillegg held SR-bank ope mellom klokka 15.30 og 18.30. Så ingen treng ruga på pengane om dei ikkje er heime når besøkjet kjem.
–Eg er glad som får vera med og gjera ein samfunnsnyttig innsats. Legar Utan Grenser gjer ein kjempeinnsats, seier Halldis Leverskjær.
– Dei tar seg av dei gløymde katastrofane og arbeider i det stille, utfyller Herabakka. Begge rosar resten av bøssegjengen. Og understrekar at innsamlingsaksjonen er dugnadsarbeid med alle bygdene som aktørar.
– Me støtter aksjonen!
Ifrah Aydid Adam (tv) og Hanna Yusuf Hussein frå Somalia har kjennskap til ”Legar Utan Grenser” frå heimlandet sjølv om dei som storbykvinner aldri kom i nærkontakt med organisasjonen. – Dei opererer mest på landsbygda, forklarer Ifrah Aydid Adam. – Det er ein organisasjon som er økonomisk og politisk uavhengig. Som stiller opp i krigsområde og under katastrofer. Nå gjer dei ein stor innsats i Dafur, seier kvinnene som oppfordrar alle til å støtta aksjonen på søndag.
