Kommunen har sett krisestab og følgjer situasjonen tett

Koronaviruset:

Frå i dag av krev kommunen riskovurderingar av arrangørar som skal samla meir enn hundre personar. Gjeld det personar i risikogrupper, er grensa 50. Det er på linje med andre kommunar i området, men strengare enn det Folkehelseinstituttet opererer med.

Per nå er det framleis ikkje påvist korono-smitte i Suldal, og ingen er heller ikkje testa. Per nå er det færre enn ti i karantene, også folk som ikkje er helsepersonell.

Krev risikovurdering for arrangement med over hundre personar
Suldal kommune følgjer Folkehelseinstituttets (FHI) tilrådingar med tanke på tiltak, men når det gjeld arrangement, har kommunen bestemt seg for å leggja seg på linja som fleire kommunar på Haugalandet nå tar.
Det betyr at Suldal kommune nå pålegg arrangørar av arrangement med fleire enn hundre deltakarar å gi kommunen ei skriftleg risikovurdering. Samlar arrangementet menneske i risikogruppa, er grensa 50. Kriteria for vurdering ligg på kommunens heimeside.

Avlyste skulearrangement på kort varsel i går
Dette gjeld frå og med i dag, og alt i går kveld blei eit stort skulearrangement på Kulturhuset avlyst på kort varsel.
Grensa som FHI har sett er på 500 menneske, men leiinga her meiner det er rett å leggja seg på nabokommunanes linje.

Kva med Suldal bad og Kulturhuset?
Kva som nå skjer med Suldal Bad, Kulturhuset, leirskulen og andre samlingsstader blir avgjort i løpet av dagen.
Det fortel rådmann Øyvind Valen, som i dag tidleg sat i møte med smittevernlege Harald Bjarne Hellesen.

Har ressursane og beredskapen, men ikkje full kontroll
Saman med resten av kommuneleiinga utgjer dei krisestaben, som enkelt sagt betyr at dei møtest og snakkest om situasjonen fortløpande.
– Å seia at me har full kontroll er feil, men me har ressursane og beredskapen til å klara dette. Nå handlar det om å gjera tiltak som kan forhindra at me får ei veldig brå og stor bølge, seier Valen

– Alle må ta ansvar
Hans utfordring nå er å balansera tiltak for å hindra smitte opp mot å halda hjula i gang.
– Styresmaktene har ansvar, men den enkelte må også ta ansvar for seg og sine utfrå sin eigen situasjon, seier Valen, som reknar med å ha fleire svar på kva tiltak suldølen kan venta seg.

Sengekapasiteten
Også levekårsutvalet blei i dag informert om stoda. Der var det også spørsmål rundt offentlege samlingsplassar, arrangement som leirskuleveka, Suldal Bad og også kapasiteten Suldal har når det gjeld sengeplassar.
Om dei første punkta kjem det altså meir informasjon seinare i dag. Når det gjeld sengeplasskapasiteten i Suldal,seier Valen at den er god. Både Bjødnateigen og Vinjar bu-og omsorgsenter kan brukast.
– Det det handlar om er at me har nok folk og hender til å gjera jobben.