Korona-smitte avdekt på Fargeriet-ytterlegare tre er smitta

I dag laurdag, melder kommunen at ytterlegare tre personar er smitta etter at det i går blei påvist smitte hjå ein tilsett på Fargeriet. Kommunen oppmodar folk som har vore innom kafeen måndag, tysdag eller onsdag om å vera merksame på sypmtom.

Dei totalt fire smitta er sette i isolasjon og smittesporing pågår utover dagen. For dei nye tre smitta meiner kommunen at alt tyder på kjent smitteveg.

Det opplyser Suldal kommune på sine nettsider nå i ettermiddag, der det blir opplyst at det kjem meir informasjon i kveld. Det var altså i går at ein tilsett på kafeen i Gata fekk påvist korona-smitte, og vedkommande hadde symptom. I går opplyste kommunen at det for den tilsette ikkje var kjent smitteveg. Det var då heller ikkje oversikt over om fleire personar var smitta og om det var kontroll på kontaktmønsteret den smitta hadde hatt.

Ber kafègjestar vera merksame på symptom

Suldal kommune ber folk som har vore innom kafeen om å vera merksame på symptom og å ha låg terskel for å testa seg. Men understrekar at det å ha vore innom kafeen ikkje i seg sjølv treng å vera grunn for å testa seg. Kommunen har også utvida opningstida for korona-telefonen og har helgeopent til klokka 20 både laurdag og søndag.