Mange unge er redde for å koma først til ei ulukke
Over halvparten (58 prosent) av unge mellom 15 og 25 år er redde for å koma først til ein ulukkesstad, ifølgje ei undersøking frå Norsk Luftambulanse.
Den same gruppa fortel også at dei er meir enn to år sidan dei hadde opplæring i hjarte- og lungeredning. Det viser tal frå ei undersøking gjort av Stiftelsen Norsk Luftambulanse.
20 alvorlege ulukker kvar dag
– Me ser at det i befolkninga i dag er for mange som har for dårleg opplæring og derfor føler seg usikre på kva dei skal gjera viss dei kjem først til ei ulukke. Og me blir bekymra over at ei så stor gruppe av den yngre delen av befolkninga manglar livsviktig kunnskap. På lang sikt kan det skapa ei utfordring me ikkje ønsker oss, seier sjeflege Hilde Wara i stiftinga i ei pressemelding.
Artikkelen held fram under annonsen.
Ifølgje tal frå Nasjonalt Traumeregister skjer det i gjennomsnitt 20 alvorlege ulukker kvar einaste dag i Noreg. To til tre av dei er livstrugande.
– Det er bra at folk vel å gjera noko, men viss skaden er alvorleg er det også viktig å varsla tidleg slik at ein får kvalifisert helsehjelp. Legevaktlege, ambulanse eller luftambulanse kan ha stor betydning for å unngå permanent skade eller død, seier Wara.
(©NPK)
