Moglegheit for nordlys onsdag – også i sør

Onsdag er det vårjamdøgn og perfekte forhold for nordlys. Sjølv i Sør-Norge kan det bli mogleg å sjå dei spektakulære fargane på himmelen.

– Det er i snitt meir nordlys rundt haustjamdøgn og vårjamdøgn, skriv fagsjef for romforsking Pål Brekke ved Norsk romsenter i ein e-post til Forskning.no

Rett vinkel ved vårjamdøgn

Brekke forklarer at dei magnetiske polane på jorda under haust- og vårjamdøgn står i rett vinkel mot straumen av solvinden, noko som gjer solvinden og solstormar meir effektive. Det blir då ei optimal stilling for å få lada partiklar frå sola og dermed generera kraftig nordlys.

Nordlyset blir skapt når stormar av lada partiklar frå sola treff magnetfeltet som strekkjer seg rundt jordkloden. Partiklane følgjer magnetfeltet innover mot polområda. Når solpartiklane treff lufta i atmosfæren, lagar dei lyset me kan sjå på himmelen.

Brekke understrekar likevel at det ikkje finst nokon garantiar for at nordlyset blussar opp rundt jamdøgna. Alt avheng nemleg av sola.

Avheng av sola

– Nordlysaktiviteten følgjer aktivitetssyklusen til sola. Kvart ellevte år går sola gjennom ein periode med høg aktivitet, kalla solmaksimum, etterfølgt av omtrent fem år med ein rolegare periode, kalla solminimum. Under solmaksimum er det mange solstormar, og under solminimum er det færre.

Til slutt tenner han håpet for ivrige nordlysjaktarar.

– Akkurat nå er me nær solmaksimum og har derfor opplevd usedvanleg mykje nordlys denne vinteren.

(©NPK)