Sand og Sauda kan mista morgonbåten til byen
Fylket må kutta i båtrutene:
Det er berre eitt av kutt-og samanslåingstiltaka for båtrutene i Ryfylkebassenget når Rogaland fylkeskommune får halvert statens tilskot til finansieringa.
Framtidas båttilbod skal opp i fylkets samferdsleutval onsdag, mens det endelege vedtaket blir gjort av fylkestinget seinare i haust. Større endringar kan uansett ikkje gjennomførast før tidlegast i 2022 grunna dagens kontrakt. Men før endeleg politiske vedtak skal berørte kommunar høyrast.
Får halvert finansieringa
Det har lenge vore kjent at fylket får halvert statens tilskot til hurtigbåt-ruter til 90 millionar innan 2021, og Kolumbus har lagt fram ei rekkje innsparingsalternativ.
Desse kjem nå til politisk behandling i prioritert rekkefølgje, og dei tre første og største, vil alle gå hardt utover hurtigbåten til indre Ryfylke.
Samanslåing
Pri 1-forslaget inneber å slå saman Sandeid-Fister og Sauda-ruta fredag og søndag og å snu 10.40 –avgangen frå Stavanger på Sand/Ropeid fredagar. Ei innsparing på nær 6, 5 millionar kroner. Konsekvensane er auka reisetid som følgje av fleire stoppestader og mindre totalkapasitet på store utfartsdagar. Rutekuttet vil ikkje gå utover pendlartilbodet, fastslår Kolumbus.
Morgonbåten
Kuttet i morgonbåten ligg i pri 2-forslaget. Det vil innebera at reisande frå Sauda og Sand må ta buss eller bil til Jelsa og reisetida til byen blir forlengja. I dette grepet ligg også forslaget om å slå saman Fister og Finnøy og å kutta Hjelmeland og Nesvik , samt å slå saman ettermiddagsbåten Fister og Finnøy i vekedagane.
På dette kan ein spara 19, 3 millionar kroner årleg, og Kolumbus meiner konsekvensane er moderate.
Farvel til laurdagsbåten?
Pri 3-forslaget er å kutta laurdagsbåten til Sauda og la buss overta som kollektiv-alternativ. Dette åleine gir ei innsparing på 3,1 millionar kroner årleg. Dette har konsekvensar for dei reisande, men ikkje for det daglege pendlarmønsteret, heiter det i sakspapira.
Konsekvensane for skuleelevane
Totalt får politikarane presentert elleve kutt-alternativ, og dei fleste resterande representerer medium eller mindre innsparingar som gjeld andre delar av Ryfylkebassenget.
Men nesten heilt nedst på lista figurerer igjen mindre kuttforslag som gjeld Saudaruta. Fylket kan spara vel ein halv million kroner på å snu kl.16.20-avgangen fra Stavanger på Jelsa/Hebnes søndagar. Kuttet er vurdert som å gi lita innsparing og eit mindre attraktivt reisetilbod.
Sist ligg eit forslag om å kutta Sand/Ropeid som stoppestad for avgangane klokka 12.30 og 15.30 frå Stavanger som vil gi ei årleg innsparing på 1,3 millionar kroner årleg. Dette meiner administrasjonen vil gi relativt lite i innsparing og store konsekvensar for pendlarar og skuleelevar i indre Ryfylke.
– Størst belastning inst i fjorden
Slik kommenterer suldalsordførar Gerd Helen Bø kuttforslaga. Ho nikkar til ordførar-nabo Asbjørn Birkeland som til aftenbladet.no seier at han meiner det er trist at kvar gong ein skal kutta, så blir det tatt lengst ute i distrikta.
Sauda og Suldal har saman fått bestilt ein rapport om korleis kommunane meiner framtidas båttilbod skal sjå ut. Eitt av punkta her er å gå for ny teknologi og reduksjon av reisetida, men ordførar Bø må berre konstatera at slike tankar er det ingen av i Kolumbus sine utgreiingar.
Finnøy-ordførar med stikk til Suldal og Sauda
Ordførar i Finnøy, Henrik Halleland, går i aftenbladet.no ut og manar til samhald blant Ryfylke-kommunane i denne saka. Han meiner rapporten Sauda og Suldal har laga representerer det motsette og meiner dei med den har begynt ”galoppen” der det er alle mot alle.
Til den kritikken svarer Gerd Helen Bø:
– Me ønskte å få belyst våre problemstillingar, og me skal nok stå ved det me har gjort.