Stadig fleire lesarar innom suldalsposten.no

Etter at Suldalsposten fekk ny nettløysing og nyhendeapp i fjor vår, har lesarane klikka visningstala til vêrs.

83 prosent av abonnentane våre har registrert seg som digitale brukarar og i løpet av fjoråret hadde avisa nær to millionar sidevisningar, eller meir nøyaktig 1 960 376.

Gledelege nett-tal

Suldølen er sugne på lokalt nytt, og nesten1100 abonnentar har så langt lasta ned nyhende-appen. Då får dei varsel kvar gong det blir lagt ut viktige nyhendesaker.

Frå me starta å telja digitale sidevisningar i 2016, har talet gått frå 672 202 i året, til 1 359 388 visningar i 2019 og enda altså på 1 960 376 i 2020. I fjorårets oppsummering spurte me oss sjølv om det kunne vere mogleg å klara 150 000 sidevisningar på ein månad. Det klarte me med glans. I mars, godt hjelpt av korona-epidemien, enda talet på på 239 000 sidevisningar.

Veg og pandemi

Det er saker om vegane våre og korona-pandemien som blei mest lesne i fjor. Saka om koronasmitte som blei påvist i Suldal, har flest visningar. Heile 7036 gonger blei den vist. På plassane etter, finn me saka som viser korleis det ser ut i Rødsliane etter eit ras, med 3698 visningar og ei sak om vegen som er stengt i Rødsliane. Men også gladsaker om folk blir godt besøkte. På fjerdeplass på lista ligg bildesaka om suldølen som strålte om kapp med sola då Sommerbilen og NRK kom til Suldal. Den ville 3951 klikka seg inn på.

Rett på mobil

Dei aller fleste les avisa på mobilen. Tala viser òg at lesarar har klikka seg inn på suldalsposten.no frå 91 ulike land det siste året.

Ei ny nettløysing, der ein enkelt kan bli abonnent, har gjort sitt til at avisa kunne utropa seg til opplagsvinnar i indre Ryfylke. Opplagstala som kom i fjor haust, viste 66 fleire abonnentar enn året før og totalt 2278 abonnentar. Med det sneik Suldalsposten seg såvidt framfor avisa Ryfylke i Sauda, som måtte sjå ein sur nedgang på 53 abonnentar og enda med fire færre enn Suldalsposten.

Gir inspirasjon

– Me er glade, stolte og takksame over kanongode tal. Det er ei direkteinnsprøyting i inspirasjonen til å jakta lokale nyhendesaker og servera suldølen vårt lokale bygdeliv på godt og vondt. Me er den einaste lokale nyhendeaktøren i ein stor, vital og viktig distriktskommune, og at talet på dei som vil betala for å lesa oss går opp er ekstra godt i tider der annonseinntektene også for oss er ei utfordring, seier redaktør Esther Moe.