Stor suksess med «take away»-basar i Jøsenfjorden

Den kreative og driftige basarkomiteen i bygda lar ikkje eit vrient virus setja ein stoppar for å arrangera haustbasar.

I går søndag inviterte dei til eit digitalt arrangement, det vil seia andakt og basar, samt leverte take away søndagsmiddag til over 50. Inntekta frå arrangementet går til bedehuset, Jøsenfjorden bedehuskapell.

Lammegryte fekk bein å gå på

Frå kjøkkenet i skulebygget vart det seld over 50 «take away-middagar» som denne dagen var lammegryte. Og i loddbøkene var det fylt opp med namn, over 3000 selde lodd vart fasiten, melder Haldis K. Nilsen, ein av dei som skipa til basaren. «Det viste seg at det nye konseptet fungerte godt i desse koronatider, og det var mange positive tilbakemeldingar!», melder ho til avisa.

Andakt og loddtrekning live

Ole Jørgen og Nina Nøstbakken stod for den nettbaserte andakten. Digitalt var også loddtrekninga. «Besøkande» kunne følgje det heile over livesending på Facebook, der flotte premiar fekk nye eigarar. Nilsen er spent på om det blir reprise til neste års påskebasar på bedehuset. Den vart også arrangert digitalt, og sette like godt omsetningsrekord med 53 610 kroner til huset. Det gjeld å gjera det beste ut av situasjonen til ei kvar tid, er innstillinga til basarkomiteen.