Suldal kan mista fleire hurtigbåt-anløp
Suldal kan risikera kutt i Sauda-ruta, i tilbodet til og frå Foreneset og i ruta mellom Nedstrand, Hebnes og Vormestrand.
Omlegginga av den statlege finansieringsmodellen for hurtigbåt og ferjesamband, der kystlinja ligg til grunn, gir store negative utslag i Rogaland, og er grunnen til at fylkesrådmannen nå føreslår kutt.
Behandlar forslaga i desember
Endringane kan tidlegast skje frå 1. januar 2023. I går hadde samferdsleutvalet i fylket kuttforslaga som ei orienteringssak. Leiar i utvalet Alexander Rügert-Raustein (MDG) forklarer at det er dei lange anbodsprosessane som gjer at endringane må bli gjort allereie nå.
– For rutene i Ryfylke går nåverande kontrakt fram til 31. desember 2022, med ei moglegheit for to års forlenging, eitt av gongen. Denne moglegheita kan me sjølvsagt nytta oss av, seier Rügert-Raustein.
Samferdsleutvalet har sitt neste møte 20. november og skal då stemma over forslaga. Saka går så vidare til fylkesutvalet i starten av desember, før innsparingsplanen blir endeleg behandla av Fylkestinget 10. desember i år.
Færre ruter i helga
Ved å redusera laurdagsruta mellom Stavanger og Sauda frå dagens to turar til ein, reknar Kolumbus med å spara 1 million kronar. Selskapet føreslår vidare å kutta frå tre til to rundturar om søndagen og reknar å spara inn 1,2 millionar kroner på det. Ved å kutta i helgetilbodet, vil ein altså spara inn 2,2 millionar kroner til saman på Saudaruta.
Dersom desse kutta blir realiserte, blir den nye rundturen nødvendigvis ikkje ein av dagens avgangar, men ei rute tilpassa det reduserte tilbodet.
– Det er viktigare å prioritera jobb og pendlar-ruter måndag til fredag, enn byturar i helgene, meiner leiaren i samferdsleutvalet.
Fleire kutt
Ved å kutta tilbodet i hurtigbåten mellom Nedstrand, Hebnes, Vormestrand, Vikedal og Sandeid, både fredag og søndag, vil ein spara 450 000 kroner. Kolumbus skriv i forslaget sitt at alle dei aktuelle stadane er landfaste og dermed kan bruka busstilbod om båt-kuttet blir realisert.
Foreneset og Bogsund
Vidare er det føreslått å kutta ettermiddagsbåten frå Judaberg mot Hjelmeland-Foreneset, som har retur frå Foreneset, både fredag og søndag. Bogsund og Foreneset vil med dette ikkje ha anløp av hurtigbåt fredagen, og berre ein tur/returavgang om søndagen, ifølgje Kolumbus. Dette gir ei samla innsparing på 560 000 kroner.
Ryfylkerutene
Kontrakten med hurtigbåtane i Ryfylke går fram til 31. desember 2022. Det er tilsaman sju hurtigbåtar som går rutene i Ryfylke, og kontrakten har ein budsjettert verdi på 119,5 millionar kroner.
Totalt gir kuttforslaga til Kolumbus over 14 millionar kroner i innsparing.
Ein krevjande prosess
Fylkesmannen skriv at eit nytt ruteopplegg for Ryfylke og Byøyane vil vera ein krevjande prosess. Kolumbus vil kunna laga eit forslag til ruteopplegg som kan behandlast politisk både i fylkeskommunen og i kommunane, men då må rammene for ruteopplegget vera gitt på førehand. Anten ved at fylkestinget bestemmer kor stort beløp som er tilgjengeleg for hurtigbåt, eller ved at fylkestinget angir kor mange fartøy som skal nyttast i dei aktuelle ruteområda.
Fylkesmannen understrekar også at ved ei ny konkurranseutsetting, er det ein risiko for at prisane også vil auka.