Telenor åtvarar mot ferie-svindel
Kriminelle kan stela passord og personleg informasjon frå deg om du loggar på gratis Wi-Fi når du er på ferie, åtvarar Telenor.
Ifølgje ei undersøking YouGov har gjort for Telenor, svarer 51 prosent at dei loggar seg på gjestenettverk på til dømes hotell, kafear og restaurantar når dei er på ferie.
Enkle å hacka
– Det kan kriminelle utnytte. På få minutt kan dei stele passord og personleg informasjon, forklarer Telenors etiske hackar, Daniel Christensen i ei pressemelding.
Artikkelen held fram under annonsen.
Han fortel at ruterar på slike stader ofte er relativt enkle å hacka, og at med tilgang til ruteren kan kven som helst følgje med på alt av trafikk som blir send via nettverket. Når du skal bruka appar og nettsider der du oppgir sensitiv informasjon, som nettbanken og e-post, tilrår Christensen å bruka mobilnett og roaming.
– På mobilnettet er all trafikk kryptert uansett, så her er du trygg. Har du høve til å bruka dataroaming når du er på ferie, er dette ofte den beste og tryggaste løysinga, seier han.
(©NPK)
