I dag er det yrke- og utdanningsmesse i Sauda. Elevane i tiandeklasse på Sand skule har skuleval på skjeva om dagen.

Tida for å velja skule

Hospitering og informasjonsmøte er unnagjort, i dag ventar yrkes- og utdanningsmesse i Sauda.

Publisert Sist oppdatert

Det er definitivt tida for å tenkja på vidaregåande skulegang og store livsval for ungdommane i tiandeklassane på Sand skule.

Blått naturbruk er populært

Rådgjevar ved skulen, Ingrid Nafstad Lyftingsmo, fortel at mange allereie har teke valet, mens andre er i tenkjeboksen. Det er slik det brukar å vera på denne tida i 10ande. Sjølv dei som er skule-leie, veit inst inne at dei nok må ha endå fleire år på skulen.

— Det er vanskeleg å spå, men så langt ser det ut til at søknadane vil dela seg jamt mellom Sauda vgs., Stavanger og ulike internatskular. Spesielt i år er at uvanleg mange, både gutar og jenter, seier dei vil søkja på blått naturbruk på Strand vgs., seier Nafstad Lyftingsmo.

Ingrid Nafstad Lyftingsmo meiner å sjå større variasjon i vala til årets tiandeklassingar enn tidlegare.

Større variasjon

Etter grunnkurs i naturbruk, kan elevane velja å gå vidare på anten akvakultur eller fisk- og fangst. Rådgjevaren meiner å sjå ei større spreiing på kva utdanningsprogram som er populære i år enn tidlegare og nemner både medier og kommunikasjon, kunst, design og arkitektur og frisør, interiør, blomar og eksponeringsdesign som eksempel.

— Det er kjekt med større spreiing, meiner ho.

Yrkesfag trumfar

Førre skuleår var fordelinga mellom studiespesialiserande fag og yrkesfag 50/50, og året før 25/75. Verken byggfag eller elektrofag, verkar å vera i vinden, men både TIF, teknologi og industrifag, og naturbruk fengjer årets tiandeklassingar.

Me har spurt seks av tiandeklassingane kva dei vil søkja på til neste år, og kva dei tenkjer om vidare skulegang.

Selma Gråberg

Selma Gråberg

— Eg har lyst å gå på studiespes og realfag i Stavanger. Sauda verkar ikkje å vera optimalt for meg. Kva eg skal gjera vidare, veit eg ikkje endå, det tenkjer eg å bruka dei neste tre åra på å bestemma. Planen i Stavanger er å bu i lag med Leandra.

Leandra Sagsveen Ollila

Leandra Sagsveen Ollila

— Eg har vore på hospitering på Hetland vidaregåande skule og topplinja entreprenørskap. Det såg veldig bra ut, og eg kjem heilt sikkert til å søkja på den. Men også medier og kommunikasjon er aktuelt. Eg kan godt tenkja meg å jobba innan TV og media i framtida. Regissør er spennande.

Raider Caune

Raider Caune

— Eg kjem til å søkja på sal og service i Stavanger. I framtida skal eg ha eiga bedrift og jobba for meg sjølv. Eg burde nok studert vidare, men tenkjer at ein kombo med arbeid og studiar ved sidan av, er bra.

Anna Sørestad

Anna Sørestad

— Eg har tenkt mykje, og har enda på studiespes i Sauda. Etter at eg var der og hospiterte, trur eg kanskje det blir studiespes med idrett som er mest aktuelt.

Rebecca Moe Olsen

Rebecca Moe Olsen

— Eg har vore på Vågen vidaregåande i Sandnes og hospitert. Helst vil eg velja noko eg synest er kjekt, så eg trur det blir medier og kommunikasjon. Det som er synd, er at då får eg verken samfunnsfag eller psykologi, som eg også likar godt. Eg vil helst bu i byen og satsar på at det blir Vågen vgs. til neste år.

Elias Nese

Elias Nese

— Eg kjem til å søkja på naturbruk på Strand vgs. på Tau og gå vidare på fiskelinja og akvakultur. I tillegg satsar eg på å få meg ei skipperutdanning. Det er lurt å ha to føter å stå på, tenkjer eg. Jobben min i framtida, blir garantert på sjøen.

Powered by Labrador CMS