Aksel Vassbø, Ella Tjøstheim og Arin Erikssønn har alle lyst å bu i Suldal når dei blir vaksne. Likevel trur dei kommunen har eit forbetringspotensial.

Ungdommane sin tur

Onsdag samla næringsliv, organisasjonar og politikarar seg til stormøte på Jelsa. Mest merksemd fekk ungdommane.

Publisert Sist oppdatert

Både Arin Erikssønn, leiar av ungdomsrådet i Suldal, Ella Tjøstheim og Aksel Vassbø, begge avgangselevar ved Sand skule, fekk fortelja litt om kva dei treng av framtidas Suldal og Ryfylke.

Hamnar i Suldal, eller noko som liknar

Erikssøn fekk saman med Othelia Mæhle og Alva Kvalvåg-Idsøe, begge frå Strand, snakka om korleis dei unge får ta del i samfunnsutviklinga, og kva kommunane i Ryfylke tilbyr dei unge i dag og kan tilby i framtida.

– Eg er veldig glad i Suldal. Eg kjem nok ikkje til å hamna i den kommunen i Norge som har dei beste tilboda, men den som formidlar dei beste tilboda til meg, anten det er jobb eller fritid. Her har me ein unik moglegheit til å formidla dette til ungdommen i Ryfylke. Jobben begynner mens dei framleis bur i kommunen. Den moglegheita må me ta. Sjølv veit eg til dømes for lite om kva som er moglegheitene for meg i Suldal, fortalde Erikssønn frå scenen.

Veit lite om arbeidslivet i regionen

Han peikte også på arbeidet ungdomsrådet har gjort med å få tale- og forslagsrett i kommunestyret og sa at dette er ein viktig måte å utvida demokratiet. Othelia Mæhle var, på si side, opptatt av at det må koma tydelegare fram kva arbeidslivet i Ryfylke kan tilby.

– Me veit kanskje minst om arbeidslivet, og kva som finst der. Me veit allereie om kva me kan få av fritid, skule og naturen, meinte ho.

Dette merkte næringslivet seg, og fleire aktørar var innom dette då dei entra scenen og fekk mikrofonen i hand.

Usikre framtidsplanar

Under overskrifta «Kva vil ungdomen og kva treng bedriftene?» fekk to andre suldalsungdommar fortelja litt om kva behov dei har. Ella Tjøstheim frå Suldalsosen og Aksel Vassbø frå Erfjord skulle begge delta på yrkes- og utdanningsmessa i Suldalshallen dagen etter. Ingen av dei har landa på kva dei skal bli. Mest sikker er nok Tjøstheim, som skal overta garden, men som også skal ha arbeid ved sidan av gardsdrifta.

På spørsmål om kva dei forventar av yrkes- og utdanningsmessa, er svara litt sprikande.

– Eg vil jobba med folk. Det blir interessant på yrkesmessa. Eg håpar å ha litt meir peiling på kva eg vil gjera etter den, fortalde Vassbø

– Eg trur ikkje eg blir noko klokare, men eg kjem nok uansett til å flytta heimefrå for å gå på skule, vekk frå dei masete foreldra. Draumen er å bu med to gode venninner i byen eller i Sauda, sa Tjøstheim.

Den beste barndommen

Begge er klare på at dei ser seg sjølv buande i Suldal etter endt utdanning. Tjøstheim og venninnene på Suldalsosen har allereie planane klare.

– Eg vil at mine ungar skal få veksa opp slik eg gjorde. Det er den beste barndommen eg kan tenkja meg. I min vennegjeng har me snakka mykje om at viss me får ungar og slikt, så skal me på turar i lag og sånt.

Må kunna få seg ein jobb

I lunsjpausen samlar avisa dei unge lovande frå lokalsamfunnet for å grava litt meir i kva planar dei har og kva dei ønskjer seg av framtidas Suldal.

– Det har alltid vore mange fine folk rundt meg og det har vore trygt i Suldal. Ein god oppvekst, rett og slett. Men det viktigaste for at eg skal bu her når eg blir vaksen, er at det finst jobbmoglegheiter. Eg tenkjer litt på å bli lærar eller fysioterapeut, og då bør det vera mogleg å få jobb her, seier Aksel Vassbø

Framsnakk, framsnakk, framsnakk

Som tredjeklassing på Sauda VGS, skal Arin Erikssønn snart ta valet om kva han skal studera. At han returnerer til Suldal er heller ikkje utenkeleg.

– Viss andre stader er flinkare å formidla kva dei kan tilby meg, blir det derimot vanskelegare, innrømmer han og meiner at Suldal må bli betre på formidling.

– Kommunen må framsnakka seg sjølv meir. Informasjon om kva som er mogleg og kva dei kan tilby er viktig. Fortelja om alt ein kan oppleva, og kva me som unge har fått oppleva.

Klart ja til eit ungdomshus

Ella Tjøstheim er klar på at ho skal ta over garden heime, men tenkjer å jobba ved sidan av. Ho vurderer mellom anna fysioterapi, politi og juss.

– Det er jo her eg høyrer heime, proklamerer ho og legg til at ho først vil reisa og oppleva verda før ho slår seg ned i heimbygda.

– Er det noko du saknar ved Suldal?

– I dag er det slik at på Osen så går det i fotball og ski, og eg driv sjølv meg begge delar. Likevel burde det vore fleire alternativ for dei som ikkje er interesserte i idrett. Stader der alle kan møtast, svarer ho, medan dei to andre nikker.

– Her er eg heilt einig med Ella. Me treng møteplassar som ikkje er så organiserte, utdjupar Erikssønn.

– Kanskje eit ungdomshus med bordtennis, gamingrom og slikt? Ein stad der alle kan henga?

– Ja, seier alle tre i munnen på kvarandre.

Powered by Labrador CMS