Fattigdomen tar ikkje pause for Mímir

Du har sikkert høyrt den fargerike Raudt-politikaren snakka om fattige og trygda som gruar seg til jul, men Mímir Kristjánsson meiner dette ei utfordring som eksisterer året rundt. Nå vil han kjempa mot dei han kallar «fattigdomsfornektarane».

Den profilerte stortingspolitikaren er ein gjengangar i media når fattigdom og trygd skal diskuterast og har gjort det til ei kampsak å løfta fram dei fattige i samfunnet. Men han er forundra over at me ikkje har dette høgare oppe på agendaen heile året.

– Dei 100 000 husstandane som årleg ber om mathjelp er fattige året rundt. Eg meiner me slit med å erkjenna fattigdomsproblemet og at me har ei stor gruppe fattigdomsfornektarar på same måte som me har klimafornektarar, seier Raudt-politikaren til Nynorsk pressekontor.

– Står ikkje i matkø for moro skuld

Mímir meiner det må bli slutt på å mistenkjeleggjera dei mange som nå stiller seg i matkø og erkjenne at folk ikkje står der for moro skuld.

– Når eg skriv og snakkar om matkøar og veksande fattigdom, møter eg ofte folk som meiner eg overdriv eller diktar opp problema. Men tala på at eg snakkar sant er dessverre tydelege. I ei undersøking utført av forskingsinstituttet Sifo går det fram at 150 000 husstandar er ille ute økonomisk. I den same undersøkinga blir også 12 prosent av hushalda definerte som «mat-usikre». Det betyr i klarspråk at dei ikkje har pengar til alle måltida dei treng, seier han.

Politikaren har ikkje noko eintydig svar på kvifor så mange ikkje vil ta innover seg at me har fattigdom her i landet.

– Kanskje har me levd på ein sosialdemokratisk løgn om at fattigdom er noko som høyrer fortida eller utlandet til, men eg er ikkje i tvil om at dette er eit problem me slit med her og nå.

Mamma er trygda

Det er nok ikkje tilfeldig at Mímir Kristjánsson er opptatt av dei som går på trygd. Han vaks sjølv opp med foreldre som hadde god økonomi, men det heile endra seg då mor hans fekk kreft og enda opp med å bli uføretrygda. I 2019 skreiv han boka, «Mamma er trygda» der han gav eit personleg innblikk i korleis det er å vera ein av dei over 300 000 menneska som er uføretrygda i Norge.

– Eg tilhøyrer dei som meiner at det ikkje er noko problem at me har så mange trygda her i landet. Det er prisen me må betala for at me har så mange som deltar i arbeidslivet og som blir utslitne og sjuke av å ha tøffe, og ofte dårleg betalte jobbar, seier han.

Han meiner det heldigvis er blitt fleire som torer å snakka om det å vera fattig i Norge i dag.

– Før var det ofte slik at media kontakta meg når dei skulle ha tak i nokon som kunne snakke om fattigdom, men nå er det fleire som snakkar opent om det og det set eg veldig pris på. Dette er ei mangfaldig gruppe som me treng å høyra meir frå.

Som austeuropeisk turn

Mange hadde nok sett føre seg den fritalande Mímir Kristjánsson i rolla som partileiar då Bjørnar Moxnes måtte trekkja seg etter solbrille-skandalen i sommar, men det er mange grunnar til at det aldri var aktuelt.

– Det var klart heilt frå byrjinga at det var Marie Sneve Martinussen som skulle ta over her, og det hadde uansett ikkje kunna blitt meg. Eg har gjort altfor mange feil til at eg hadde overlevd i ei slik stilling, seier Mímir.

Han har aldri lagt skjul på at han alltid har vore glad i å ta seg ein fest og framleis likar denne delen av livet.

– Det er sjølvsagt riktig at politikarar må gå av etter å ha gjort feil og spesielt om dei har utnytta stillinga og den makta dei har for eiga økonomisk vinning. Men når journalistane nå går gjennom gamle eksamensoppgåver frå 15 år tilbake i tid byrjar det å bli litt vel mykje. Eg fryktar at vi nå vil få berre broilerar inn i politikken. Det blir litt slik med politikken som det var med austeuropeisk turn. Du må få dei inn i femårsalderen før dei rekk å gjera noko gale!

Sjølv treng ikkje rogalendingen vere redd for at nokon skal gå gjennom gamle masteroppgåver. Han avslutta nemleg utdanningsløpet etter vidaregåande skule og lever godt med det valet.

Byr på seg sjølv

Det er ikkje berre i saker som gjeld trygd og fattigdom at Kristjánsson stiller opp i media. Han er ikkje tung å be uansett kva det handlar om og er ikkje redd for å «bjuda på». Då NRK Dagsrevyen ville lage ei sak om solkrem var han rask med å stilla seg til disposisjon i bar overkropp utanfor Stortinget. Han var også nyleg på Dagsnytt 18 der han gladeleg kunne fortelja at når han har kleda på seg så kler han seg ofte som ein «dass».

– Eg trur eigentleg ikkje at eg er så veldig open som det folk vil ha det til, men eg skil meg kanskje litt ut som politikar fordi eg ikkje er så redd for å vera med på ting utan at eg førebur meg med masse talepunkt og tek meg sjølv så alvorleg. Og når det skal handle om solkrem så er det jo naturleg å visa litt hud, seier han.

Likar møta med vanlege folk

Bar overkropp er også naturleg når han støttar opp om favorittlaget sitt Viking. Han nølar ikkje med å gi oss eit privat bilete frå fotballkamp, der han på folkeleg vis har kasta skjorta og gir alt for favorittlaget. Han trur elles at det er viktig, og ikkje minst morosamt, for politikarar å ha slike interesser utanfor politikken.

– Gjennom fotballen møter eg vanlege menneske og det er fint å ha stader der me ikkje er opptekne av politikk, men dyrkar lidenskapen til fotballen enten me tilhøyrer Framstegspartiet eller Raudt.

Det såg lenge ut til at laget hans, Viking, skulle nå heile vegen til topps i eliteserien denne hausten, men på tampen av sesongen kom motgangen og laget enda til slutt på ein skuffande fjerdeplass. Nedturen for laget starta samtidig med at Kristjánsson hadde ein alkoholfri periode.

– Supportergjengen har hatt mykje moro med det, og dei håpar det blir lenge til eg skal ha ein kvit månad igjen, ler han.

(©NPK)