– Kva har skjedd dei siste fem åra?

Sanja R. Heggelund (H) undra seg i sist vekes levekårsutval over at ingen ting er skjedd sidan politikarane for fem år sidan gjekk inn for eit barne- og familieteam.

– Når ungdommane sjølv ikkje veit at der finst ein psykolog for dei i kommunen, så er det trasig, meinte ho og viste til at kommunepsykologen berre brukar fem prosent av stillinga si på barn og unge.

Manglande forankring?

– Rapporten kjem med ein alvorleg konklusjon, og dette er jo verkeleg ikkje haldbart, sa Mads Drange (Ap), og fortsette:

– Me har fått mykje god informasjon i levekårsutvalet dei to siste åra. Me har høyrt om mange pilotar og prosjekt drivne fram av dyktige rådgjevarar her på huset, men kor godt er dette arbeidet forankra ute i organisasjonen, spurte han og meinte forankring kanskje var den største utfordringa.

Han minna også om at dette handlar om leiarskap, og at det krevst god leiing for å forankra arbeidet ut i organisasjonen.

– Me kan ikkje leva med slik det er nå over tid.

–Vanskeleg å svara på

Kommunalsjef for helse, Grethe Jæger Anglevik, syntest det var vanskeleg å svara Høgre-representanten Heggelund på kvifor berre fem prosent av psykolog-tida blei brukt på dei unge.

– Det er ikkje bestemt at det skal vera slik. Eg fekk meg sjølv ein aha-oppleving i ungdomsrådet, der tilbakemeldinga var at dei ikkje visste det var ein psykolog i Suldal, så dette må me jobba vidare med nå.

Opprettar arbeidsgruppe

Anglevik meiner det er ulike grunnar til at kommunen ikkje har fått tilbodet til slik dei ønskjer og oppgav fråfall og sjukemeldingar som ein av grunnane. Kommunalsjefen informerte utvalet om at ho nå vil sjå på samorganisering og arbeida vidare med å bli flinkare på systematisering.

Ei arbeidsgruppe blir nå oppretta. Dei skal jobba med å finna ut kva som er lurt å gjera når det gjeld organisering av dei kommunale tenestene. I det arbeidet skal dei som jobbar i fagfeltet, psykologen og ungdomsrådet vera med.

Vonde tal

Astrid Kvæstad (SV) har tatt over i utvalet etter Annette Opheim, som har flytta frå kommunen. Kvæstad uttrykte spesielt uro over talmateriale som viser kor vanskeleg det er å gå vidare med ei bekymringsmelding.

– Dette er vonde tal å lesa, sa ho.

Ingebjørg Rullestad Gjerde, kommunalsjef for oppvekst, kunne forsikra Kvæstad om at det blei jobba kontinuerleg med BTI-arbeidet. (Betre tverrfagleg innsats).

– Me er i implementeringsfasen og jobbar veldig aktivt med brukarmedverknad. Me jobbar systematisk over tid med våre tilsette ute i einingane. Me har fullt fokus.

Haltande rapport

Rullestad Gjerde minna om at somme av tala som kom fram i rapporten, som blei bestilt i fjor haust, var gamle og ho var usikker på kven som var intervjua.

– Er det berre tilsette på helse-sida og ikkje innan oppvekst, då spørst det jo kva som kjem fram.

Også leiaren i utvalet, Magne Steine (Krf), meinte rapporten halta litt, då ingen i oppvekstsektoren er blitt spurde, men han var glad for at kommunedirektøren ikkje avviser problema.

Vedtaket frå levekårsutvalet

1. Suldal kommunestyre har merka seg det som kjem fram i Rogaland Revisjon IKS sin rapport «Psykisk helsehjelp» og tek denne til orientering.

2. Rapporten vert oversendt til kommunedirektøren for vidare oppfølging av rapporten sine sju tilrådingar.

3. Kommunedirektøren gir tilbakemelding til kommunestyret via kontrollutvalet om oppfølging av rapporten innan 9 månader etter at kommunestyret har gjort sitt vedtak.