Arin Eirikssønn nemnt i Finansdebatten

Under finansdebatten 2. desember var fleire frå rogalandsbenken på talarstolen for å snakka om pengane til Rødsliane. Ein av dei var Tom Kalsås (Ap), som sit i transport- og kommunikasjonskomiteen.

I sitt innlegg i finansdebatten rosa Kalsås Arin Eirikssønn sin appell utanfor Stortinget i førre veke. Eirikssønn er leiar av Suldal Ungdomsråd, og var med på bussturen til Oslo. Der heldt han ein appell som gjorde inntrykk på fleire.

– Glitrande appell

Frå landets mektigaste talarstol får den unge karen ros frå Kalsås, som er ein av fleire nye på rogalandsbenken etter valet. I sitt innlegg sa han:

– For litt over ei veke sidan kom der ein full buss med folk frå Ryfylke og Suldal for å markera sin kamp for ein trygg skule- og arbeidsveg forbi Rødsliane på riksveg 13. Ein av dei som tok turen var Arin Eirikssønn, leiar i Suldal Ungdomsråd. Han heldt ein glitrande appell her utanfor på Eidsvolls plass, der han fortalte korleis utryggleiken for skuleungar og dei som dagleg køyrer forbi strekninga går på helsa laus.

– Litt starstruck

Då Suldalsposten ringar Arin Eirikssønn blir han tatt litt på senga.

– Oi! Det har eg ikkje fått med meg, nei. Det er jo råkult og tydar vel på at eg sa noko vettug når me var i Oslo. Eg må seia at eg er starstruck, seier ein litt mållaus Eirikssønn.