Tre Bakka-søskenbarn gjer sitt til at Sand toppar statistikken
Jordmor Marit Mansåker Landa sit med fasiten over fjorårets fødselstal, og dei er ikkje særleg mykje betre enn 2021-tala. To fleire suldøler blei fødde i fjor enn året før.
34 babyar blei fødde i Suldal og ein i Jøsenfjorden, ifølgje jordmora.
Flest nye sandbuar
Flest blei fødde med adresse Sand. 13 nye sandbuar er ein meir enn i 2021. Suldalsosen har klart fleire enn dei gjorde i botnåret 2021 då grenda berre hadde tre fødslar.
Artikkelen held fram under annonsen.
I 2022 blei det fødd seks babyar med adresse Suldalsosen. Erfjord, Jelsa, Vanvik og Nesflaten tangerer 2021-tala med høvesvis fem, fire, null og ein fødde i dei respektive grendene. Nesflaten er registrert med fem fødde dei siste seks åra, og ikkje mykje betre ser det ut i Vanvik. Der tre er fødde dei siste seks åra. På Ropeidhalvøya og på Jelsa har dei funne ut av det, og det er grendene med størst auke i fødselstala dei siste åra.
Nærmar oss naboen
I 2021 blei me gruste av naboane inst i fjorden. I Sauda enda det med 50 nye saudabuar, mot 32 nye suldøler. I fjor jamna tala seg ut. Sauda, med nesten 800 fleire innbyggjarar enn Suldal, enda på 38 fødde, ikkje meir enn fire fleire enn i Suldal. Jordmor Marit Mansåker Landa frå Vindafjord, som arbeider i følgjetenesta for fødande i Suldal på åttande året, kan ikkje lova nokon fødselsbonanza i Suldal i 2023.
– Nei, då må det skje mykje i tida som kjem. Akkurat nå ser det ganske likt ut som for fjoråret.
Fødselstal 2017-2022
2022 | 2021 | 2020 | 2019 | 2018 | 2017 | |
Erfjord | 5 | 5 | 12 | 6 | 6 | 5 |
Jelsa | 4 | 4 | 1 | 3 | 2 | 4 |
Nesflaten | 1 | 1 | 1 | 1 | 0 | 1 |
Ropeidhalvøya | 5 | 7 | 0 | 2 | 3 | 3 |
Sand | 13 | 12 | 10 | 14 | 18 | 20 |
Suldalsosen | 6 | 3 | 6 | 9 | 6 | 16 |
Vanvik | 0 | 0 | 1 | 1 | 0 | 1 |
Heile Suldal | 34 | 32 | 31 | 36 | 35 | 50 |