Referat: 1. mai blei markert med tog og arrangement på Sand

Måndag 1. mai var det i heile verda arbeidarane sin dag, og på Sand blei dagen markert med tog som gjekk frå kommunehuset og eit arrangement på Kulturhuset.

Leiar i Suldal SV, Tone Mari Sand, har i ettertid skrive eit referat frå dagen, ein dag ho mellom anna karakteriserer som ein kamp- og festdag. Sand skriv følgjande:

Hovudtale frå Kari Vestbø

Etter 1.mai-toget, fekk nærare 80 frammøtte i foajeen på Kulturhuset høyra Kari Vestbø sin engasjerande og tankevekkjande 1.mai-tale. Vestbø er 2.kandidat for Rogaland SV til fylkestingsvalet.

Ho fortalde om oppveksten på Sand, der ho som barn opplevde små forskjellar mellom folk. Ho ba oss vera merksame på at desse forskjellane no er aukande i Noreg, og at også her lever mange barnefamiliar i vedvarande fattigdom. Vidare snakka ho om kor urettvist det er at mange av landa med minst klimautslepp er dei som opplever størst konsekvensar av klimakrisa. Me må stå saman som "eit lag", mana Kari Vestbø.

Appellar, song og god prat

Appellen frå Ap sin lokallagsleiar Morten Bakken, handla om kor viktig det er å fagorganisera seg. Amnestygruppa fekk oss, etter deira appell, men på å skriva brev for å protestera på menneskerettsbrot i Afganistan og Bahrain.

Zoom Førre Neste

Reidar Sand opptrådde med arbeidarsongar, og leidde også alle dei frammøtte i rungande allsong. Både barn, ungdom og vaksne i alle aldrar kosa seg på Kulturhuset denne fest- og kampdagen, der det etter programmet var kaker, kaffi, is, brus og god prat.