Rv 13: Nå er vegen mellom Nesflaten og Røldal open igjen
Det melder Statens vegvesen nå like før klokka 09, måndag morgon.
Då stengingane ved Lovraeidet og Helganes blei oppheva i går ettermiddag, forblei riksvegen mellom Nesflaten og Røldal stengt. Vegvesenet sa i går at dei skulle ta ei ny vurdering i dag, måndag, klokka 10. Beslutninga kjem dermed ein times tid tidlegare.
Store mengder regn
Uvêret og store mengder nedbør med medfølgjande rasfare, stengte riksveg 13 både aust og lenger sør i Suldal delar av helga. Natt til søndag gjennom søndagen var vegen ved Helganes og ved Lovraeidet stengt, og først søndag ettermiddag blei det opna for utrykningskøyretøy som fekk passera.
Artikkelen held fram under annonsen.
Ope over Gullingen
Fylkesvegen over Gullingen har ikkje vore stengt, men den generelle oppfordringa frå vegvesenet har vore å utsetja køyreturar i dag grunna store mengder nedbør og vanskelege køyreforhold.
Statens vegvesen plasserte også ut vakter ved stengestadene.
Vakter ved stengepunkta
Det er ikkje meldt om ras i Suldal så langt. Klokka 06.30 søndag morgon opplyste vegvesenets trafikksentral at det blei sett ut vakter ved stengepunkta Nesflaten, Helganes på Suldalsosen, Sand og Lovraeidet. Også ved Kjeldehammartunnelen mellom Nesflaten og Håra er vegen stengt.
Ber folk om å utsetja køyreturen
Helga har så langt vore prega av ei rekkje ras på Vestlandet, både i Rogaland, Vestland og delar av Agder. I Ullensvang blei 20 hus evakuerte etter to ras i området. Vêrutsiktene for i dag er ikkje mykje betre og vegvesenet oppmodar folk om å utsetja planlagde køyreturar.