– Ord kan ikkje uttrykkja takksemda for hjelpa og støtta
Storbrannen i Fjellet:
Slik ordlegg Jarle Haugsland seg morgonen etter brannen som tok livet av rundt 300 griser og som har totaløydelagt store delar av driftsbygninga på garden han driv saman med kona Brit Ane Haugsland på Haugsland ved Nattlandsvatnet i Fjellet i Erfjord.
Vil takka
– Me er så takksame for all hjelp og støtte, både til dei som kom og dei som sende meldingar. Me klarer ikkje å svara på alle, men det er veldig viktig for meg å få takka, sa bonden, som ikkje hadde hatt mykje blund på auga i natt. Men garden og slåtten stansar ikkje, med eit tun med både politi, brann, presse og naboar, stod bonden mest fast i ein kimande telefon. Då det mest nødvendige heime var gjort, stod Haugsland på farten vidare for å finna løysingar på slåttearbeidet.
Snarrådige søner
Familien fekk kjenna naboskap og støtte då brannen braut ut ved 17.30-tida i går. Haugsland sjølv var ute på slått, men blei kalla heim der sønene hadde fått berga ut alt av storfe.
Bygdefolk og naboar strøymde til og fekk tilrettelagt for brannmannskapa som var på staden like før klokka 18.00, og brannsjef Morten Aarhus er stort imponert over både innsatsen til sønene på garden og måten folk har stilt opp på.
– Eg er veldig nøgd også med mannskapas innsats, i går handla det om å begrensa skadane og å berga ut dyr. Då er det uvurderleg hjelp når naboar og familien sjølv gjer så god jobb, rosar han, som sjølv har vore heile natta på brannvakt på staden. Fleire av grisene blei berga ut takk vera ein entreprenør som stilte med gravemaskin og kom til i det brennande bygget.
Ventar på skarpskyttar
Politiet var alt i går kveld godt i gang med etteforskninga som handlar om informasjonsinnhenting og avhøyr av vitne, og det arbeidet gjekk for fullt i dag tidleg også. Men lensmann Siri Fisketjøn Indrebø rekna ikkje med at det blir mogleg å få komma til i sjølve bygninga før over helga, til det er det for utrygt og varmt endå. I dag tidleg venta dei på ein skarpskyttar frå Haugesund som skal punktera ei flaske med argongass.
Kan ikkje seia noko om årsaka i dag
Lensmannen sa i dag at ho reknar med at arnestaden er i den delen som er mest utbrent, men kunne ikkje seia noko om årsaka til storbrannen som aldri truga våningshuset på garden, ifølgje brannsjef Aarhus.
140 griser blei berga ut i live i går kveld, av desse måtte fem naudslaktast på staden.
Ingen personar blei skadde i brannen, bortsett frå at ein person fekk behandling etter å ha pusta inn røyk, men vedkommande var i fin form etterpå.
–
