Kåseri om kongebiblar

Bibelselskapet 200 år:

I kveld byr Ryfylkebiblioteket Suldal, saman med Folkeakademiet Suldal, Kyrkja i Suldal, Sand sokneråd, Suldal Mållag og Ryfylkemuseet, inn til ein kveld der ein kan både sjå og læra meir om kongebiblar.

Fire kongebiblarar
Arrangementet er ein del av Ryfylkebiblioteket Suldal si markering av at Bibelselskapet i år er 200 år. I sist veke opna bibelutstillinga i folkebiblioteket på Kulturhuset. Olav Skjellevik frå Tysnes vil ha eit biletkåseri og visa fram eldgamle kongebiblar, heile fire i talet. Dette er originalutgåver av dei første biblane som blei trykte etter reformasjonen i regi av tre dansk-norske kongar. Ein av dei, Christian IV s bibel frå 1633, er på heile sju kilo og er 13 centimeter tjukk.

Suldalsbiblar og song
I førekant av den lokale bibelutstillinga, vart suldøler oppmoda til å dela sine historiar om sin bibel og sjølve eksemplaret av boka til å visa fra fram. I utstillinga kan ein mellom anna finna biblar som har hatt eit liv i Suldal.
Det blir ikkje berre føredrag denne kvelden, men også musikalsk innslag. Trioen Olaug Marie Hebnes, Birgit Nerheim og Kristin Sandvik deltar med song.