Suldalsjente i Hollywood: – Stråpanuten er favoritten

Me har på ekte ei stor stjerne i Hollywood, folkens, og nei, det er ikkje noko småtteri. Alice Hewkin er halvt suldøl og har ho ei stor rolle i den aktuelle Netflix-serien The Brothers Sun. I tillegg har ho også vore med i mange av dei andre mest kjende seriane me fråtsar i her heime. Til sommaren er ho tilbake på favorittstaden sin.

– Etter ein lang dag på tur i heia, er det ingenting som slår eit herleg bad i Mosvatnet, meiner skodespelar Alice Hewkin.

Jobbar med dei største

Med mor, Kari Bråtveit frå Suldalsosen, har Alice både norsk og britisk statsborgarskap. Til vanleg bur ho i London, men akkurat nå held altså 30-åringen seg i Los Angeles og Hollywood. Her er ho travel med å promotera den nye og kritikarroste serien The Brother Sun med Oscar-vinnar Michelle Yeoh i hovudrolla. Tidlegare har Alice vore med i mellom anna dei verdskjende seriane Sex Education, The Crown, Game of Thrones og Emily in Paris.

Elskar å vera i Suldal

For Alice er Suldal den absolutt beste stad på jord for å lade batteria mellom slaga. Ho elskar stilla, naturen, familien og fjella. Sist sommar blei ho stolt nutfant. Går alt som ho ønskjer, er ho tilbake i sitt barndoms paradis også til sommaren. Med premiere 4. januar, spring stjerna frå den eine raude løparen til den andre om dagen, men jammen fann ho tid til å sende ei helsing «heim»:

Ei helsing frå Hollywood

Så lenge eg kan huska, har eg brukt somrane mine i Suldal. Staden der mor er fødd og oppvaksen. Suldal er den mest dyrebare plassen i verda for meg fordi det er her eg verkeleg kan slappa av, vera i naturen og oppleva dei vakraste utsikter. Alt dette, medan eg brukar tid med familien min. Eg elskar å vera saman med dei.

Den store fridomen og Moste Marta

Då me var små, forstod nok ikkje søster mi og eg kor frie me eigentleg var i Suldal. Her kunne me streifa rundt på eiga hand og gå på butikken utan vaksne. I Storbritannia måtte me i bil same kor me skulle, då me budde i byen. Eit spesielt kjært minne frå barndomen min i Suldal, er alle besøka hos «gamalmoste» Marta, som alltid serverte saft og kaker. Ho tok seg tid til å snakka med oss på ein miks av norsk og engelsk. Dette er opplevingar eg gøymer i hjarta.

Nutfant!

Eg elskar friluftslivet. Klatring og fottur til fjells er favorittane mine. Etter ein lang dag på tur, er det ingenting som slår eit herleg bad i Mosvatnet. Førre sommaren blei eg ein skikkeleg stolt nutfant. Om eg skal velja ein favorittstad i Suldal, må det bli Stråpanuten. Utsikta over alle fjella og Lågen som slynger seg nedover dalen, er heilt spektakulær. Derfrå kan eg òg sjå rett ned på garden der familien min kjem frå.

Å berre svinga innom i døra

Eg er veldig glad i å prata med folk, eg elskar å omgi med med vener og familie. Derfor er det så fint å berre rusla mellom husa, prata og høyra korleis det står til, og eta mengder av kaker og vaflar. Heime i London må ting alltid planleggast, derfor er det så avslappande og fint å berre kunna svinga innom i dørene når me er i Suldal. Med mindre jobben hindrar meg, ser eg fram til sommar i Suldal i år også, denne gong er Vinjanuten på lista mi.

– Alice

Audmjuk superstjerne

Alice Hewkin har over 25 000 følgjarar på sin Instagram-konto med same namn. Ein skal ikkje scrolla lenge i det glamorøse universet, før fleire bilde av eit nydeleg, sommargrønt Suldal dukkar opp. I ei melding til avisa takkar ho stort for at me vil skriva om henne, og me kan berre seia sjølv takk og ønskja stjerna all lukke vidare i den forrykande karrieren.