Hurtigbåtruta til Vormestrand

Hytteeigarane på Vormestrand har sett at kommunestyret i Suldal har bede kommuneadministrasjonen seie opp leigeavtalen av Døsja kai på Vormestrand.

For oss hytteeigarar på Vormestrand vil det vere eit tap å miste dei tre anløpa i Sandeidruta, to til Vormestrand fredag og eit til Stavanger søndag kveld.

Mange av hytteeigarane og helgegjestane kjem frå Stavanger. Dei som ikkje vil køyre den lange og sterkt trafikkerte Ryfylkevegen, synest ein båttur til og frå Vormestrand er eit mykje betre tilbod. Viss dei ikkje kan følgje Sandeidruta til og frå Døsja, men likevel vil reise med båt, må dei skaffe bilskyss til og frå Hebnes. Det er tungvint og kostbart. Alternativa til anløp av Døsja vil også vere eit miljømessig tapsprosjekt.

Suldal er ein stor hyttekommune som gjerne vil ha fornøgde hyttegjestar. For oss vil det vere eit negativt signal om kommunen vel å seie opp leigeavtalen av Døsja kai, og slik gjere det vanskelegare for oss å reise mellom Stavanger og Vormestrand. Difor ber vi kommunestyret om på nytt å vurdere om det er tenleg å seie opp kaiavtalen.

På vegner av hytteigarane på Vormestrand, Roar Lund