Inn på kommuneteppet

Leiar:

Kommunereforma er på randen av å ta form. Når Suldal sjølv har tatt sitt standpunkt og sine politiske tvekampar og dei rundt oss har gjort det same, er det snart tid for kommuneleiingane å møta dei høgare makter. Nærare bestemt fylkesmannen og hennar folk, som ein må tru har eit ganske kraftig ord med i laget i form av ei innstilling til kommunaldepartementet og minister Jan Tore Sanner, gudfaren til heile den omstridde reforma.

Så langt må det vera lov å oppfatta vidstrekte Suldal  som litt “verna” frå potensiell samanslåing, det er ikkje tvangsgifte som er i spel når ordførar Gerd Helen Bø er innkalt til møte.

Det er nok ingen vågal spekulasjon å tippa på at det fylkesmann Magnhild Meltveit Kleppa vil ha er ei forklaring på kva det er Suldals politiske fleirtal tenkjer når dei meiner Hylsstronda framleis skal liggja til dagens kommune, sjølv om vegen til tenestene og sentrum er lengre enn nokon gong og all geografi tilseier Sauda.

Det er rett og slett ei god gammaldags grei ut og drøft-oppgåve som ventar suldalsordføraren, men så er spørsmålet om svaret lar seg framføra i anna enn lyrikk og poetiske vendingar.

Då politikarane før sommarferien diskuterte rådmannens forslag, som blant anna innebar å utjustera Hylsstronda til Sauda, var det eit overveldande fleirtal mot den tanken. I argumentasjonen mot gjekk ord som kjensler, identitet, tilhøyrigheit, band og røter igjen. Varaordførar Kari Vaage Gjuvsland (Ap) som argumenterte for rådmannens forslag, konkluderte til slutt i debatten at med så mykje følelsar involvert, var det lite å få gjort av endringar.

Det var nok rett analyse, og sjølvsagt, slike omsyn høyrer også med i kommunegrense-debatten. Møtet med fylkesmannen blir nok ein aldri så liten eldprøve på om kommunestyrefleirtalets argumentasjon er handfast nok og adresserer det som er kommunens eigentleg kjerneoppgåver. Det kan henda at fylkesmann Magnhild Meltveit Kleppa synest det blir i meste laget med kommunekjensler når framtidas strategiar skal hamrast ut i og formulerast til framvising i departementet.

Tida vil visa. Det kan henda at både Suldal  og Ryfylke er på veg mot endring, at Ryfylkerådet nå planlegg ein skikkeleg samsnakk om det, er fornuftig og på sin plass.